D Aachener Thermalkwelle

Es git mee as 30 Thermalkwelle z Aache und die zele zu de ergiibigste Thermalkwelle in Dütschland. Si chömme in zwäi Kwellzüüg im Aachener Stadtgebiet an d Oberflechi. Dr Thermalwasserzug in dr Aachener Innestadt isch 500 m lang, maximal 50 m bräit und s Wasser bricht an e Hufe Blätz uuse. Vier vo deene si hüte no zuegänglig, zwäi wärde bewirtschaftet.

Übersichtscharte vo de Aachener und Burtscheider Thermalkwelle und vo de Stazioone vo dr Thermalwasserrute.

Dr Thermalwasserzug vo Burtscheid, wo hüte e Stadtdäil vo Aache isch, isch 2200 Meter lang mit e Hufe Kwelle. Mä chunnt no an elf Kwelle aane, vier drvo wärde hüte no gnützt. D Kwelle si mänggisch mee as 72 °C häiss und ghööre mit de Thermalkwelle vo Karlsbad zu de häissiste Kwelle in Middelöiropa.

Scho zu Zite vo de Römer si d Thermalkwelle für Häilzwäck gnützt worde. Si si äine vo de wääsentlige Faktore für die politischi und wirtschaftligi Entwicklig vo Aache gsi, bsundrigs vom Kur- und Baadwääse, dr Duech- und Noodleindustrii und vo dr Mineralwasserprodukzioon.

Weblingg

• Stadt Aachen: Kuren und Baden, Aachener Thermalquellen und Badegeschichte, abgerufen am 28. Januar 2012
• Thermalwasserroute Aachen, abgerufen am 28. Januar 2012
• Thermalwasserroute Aachen – Zurück zu den Quellen (Site cha nüme abgrüeft wärde; Suche im Webarchiv)[1] [2] Vorlage:Toter Link/bs.xq-intern.de (PDF-Datei; 742 kB), abgerufen am 28. Januar 2012
• Carolus Thermen
• Bad Aachen – Das Fließen der Quellen genießen.

Dä Artikel basiert uff ere fräie Übersetzig vum Artikel „Aachener_Thermalquellen“ vu de dütsche Wikipedia. E Liste vu de Autore un Versione isch do z finde.