Aigeide

D Aigeide (altgriech. Αἰγεῖδαι, Aigeidai) isch e wiitverzwigts Gschlecht im antike Griecheland gsii. Si sind för s boiotische Thebe, Sparta, d Insle Thera und Kyrene bizügt. De bikanntisch Aaghöörig vo de Aigeide isch de Poet Pindar.

Verbraitig

Nochem Herodot sind d Aigeide e groossi Phyle vo Sparta gsii.. Nochem Aristoteles sind si e Phratri vo Thebe gsii. Nochem Pindar sind d Aigeide vo Thebe uf Sparta choo und hend uf Wiisig vom delphische Orakel d Stadt Amyklai iignoo. Vo Sparta sind denn Aigeide uf d Insle Thera choo, wo i de Antiki as e spartanischi Gründig ggolte hett. Vo Thera isch e Tail vo de Aigeide wiiter uf Kyrene uusgwanderet, wo e theräischi Kolonii gsii isch.

Mythischi Herkunft

I de griechische Mythologi isch de Stammvatter vo de Aigeide de Aigeus gsii, de Soo vom Oiolykos. Z Sparta isch e Heroon vom Aigeus gstande. Sii Groossvatter Theras hett d Insle Thera bisidlet, vo wo uus di libyischi Stadt Kyrene gründet woren isch. De Theras selber isch de Soo vom Autesion gsii, wo de letschti König vo Thebe usem Gschlecht vo Kadmos gsii isch. Ase bringt de Mythos die verschidnige Ort, wo Aigeide glebt hend, mitenand i Verbindig. D Aigeide hend mmer no underem Fluech vom Laios und Ödipus glitte und di männliche Noofaare sind jung gstorbe, bis si uf Ghaiss vomene Orakel, de Erinnye e Hailigtum gstiftet hend.

Aaghöörigi

• Euryleon
• Pindar

Literatur

• Karl-Wilhelm Welwei: Aigeidai. In: Der Neue Pauly (DNP). Band 1, Metzler, Stuttgart 1996, ISBN 3-476-01471-1, Sp. 315–316.