Alfred Kleinknecht

Dialäkt: Schwäbisch

Dr Alfred Kleinknecht (* 10. Sebdember 1911 z Moogschded, † 13. Auguscht 1944 en St. Sauveur de Carrouges em Departement Orne en Frankreich) ischt a deitscher Moler ond Zoichner gwäa, wo en seim kurza Leaba etliche Landschaftsbilder, Dorfoosichda, Bloama-Still-Leaba, Porträäs ond Aktzoichnonga gschaffa hot.

Aus seim Leaba

Dr Alfred Kleinknecht kommt ama Sonndich em Johr 1911em wirdabergischa Dorf Moogschded uff d Welt. Sei Vadder isch dr Mechaniker Gottlob Kleinknecht ond sei Mueder d Katharine geborene Ruthardt. Scho während seira Schuelzeit nemmt der Bua Ondrricht em Zoichna beim Moogschdeder Holzbildhauer Österle. Noch-em Schuelabschluss macht’r a Lehr zom Lithografa bei dr Stuegerter Druckerei ond Vrlagsostalt Chr. Belser AG ond bsuecht obneds noh Kurs an dr Kunschtgewerbeschuel ond an dr Staatlicha Kunschtakademii. Dui viirjähriga Lehrzeit schliaßt’r ab mit dr Not sehr gut. Trotzdem koo-nen sein Ausbildongsbetriib bloß a kurza Zeitlang als Lithografa-Ghilf bhalda. De nägscht Oostellong kriagt der jonge Moo bei de Grafische Kunscht-Oostalda Adolf Müller z Gebbenga. Aber au deet dauret’s et lang, ond dr Kleinknecht ischt wiider arbeitslos. Er legt sich aber et uff de faul Haut, sondern setzt em Wendersemeschder z Stuegert sei Studiom an dr Staatlicha Kunschtakademii fort. Em Sommer 1931 wandret’r an d Nordsee, em Sommer druff en da Schwarzwald ond ibr d Alpa bis noch Bozen. Sein Onderhalt bestreidet’r mit Gleagaheitsarbeida ond mit-em Vrkauf vo Zoichnonga.

Neabem Mola ond Zoichna ischt s Fuaßballspiila em Kleinknecht sei Leidaschaft. Weil’s aber en seira Hoimetgmoind koin entsprechenda Vorei meh geit – dr Moogschdedder Arbeidersportvorei ischt 1933 vo de Nazis vrbodda worra –, tridd’r em Nochbrdorf Maichenga en da dordiga Turnvorei ei. En sellem Vorei lernt’r au d Emma Wolff kenna, wo-nr späder zom Traualtar fihra koo.

Em Johr 1934 kriagt dr Kleinknecht a Stell als Technischer Zoichner beim Konstruktionsbiro vo dr Daimler-Benz AG, Werk Sendlfenga. Seine Hauptaufgaba bestandet em Ofertiga vo Offert-Zoichnonga fir entressirde Auftraggeaber ond Entwirf vo de neie Automobilmodell. Noch-em Feierobed bsuacht’r vorschidene Kurs em Mola ond Zoichna an dr Stuegerter Kunschtakademii.

Noch dr Heirat em Johr 1938 ziagt des jonge Ehepaar vo Moogschded noch Maichenga. Em Johr druff wuud dr Kleinknecht en d Reichskammer der Bildenden Künste uffgnomma. Des isch d Bedingong drfir, dass’r des notwendige Matrial, wo-nr zom Ausfihra vo seira Kunscht braucht, zom Beispiil Leiwand, Farba ond Bensl, ibrhaupt ooschaffa koo. En d Nazionalsozialischdischa Deitscha Arbeiterpardei (NSDAP) tridd der Moo aber et ei.

1942 hend dr Alfred Kleinknecht ond sei Emma Grond zom Feira: s Dechterle Inge kommt uff d Welt.

Obwohl dr Kleinknecht em Kriag als UK eigstuaft worra ischt, wuud’r em Dezember 1943 – er ischt jetzt 32 Johr alt – noh zor Wehrmacht eizoga. Grond do drfir dirft sei, dass der Moo et Mitgliid vo dr Pardei worra ischt. Noch-ra sechswechiga Schnellbleiche hoißt’s „Ab noch Frankreich!“. Glei em Johr druff kommt’r en de franzeesisch Kriagsgfangaschaft. Deet schliaßt’r am 13. Auguscht 1944 en dr Normandii seine Auga fir emmer, nochdem’r uff-ra Stroßakreizong vo-ma Schuss us-ma Mascheenagwehr tedlich vorletzt worra ischt. Grad amol 33 Johr send sellem Moo zom Leaba vorgennt gwäa.

Ausstellonga

• 1940/41 send Bilder vom Alfred Kleinknecht bei dr Werk-Kunstausstellung vo dr Daimler-Benz AG z Sendlfenga zeigt worra.
• 1985 ischt s Alde Rothaus vo Maichenga noch seira Reschdaurirong mit-ra Ausstellong vom Alfred Kleinknecht seine Bilder eigweiht worra.
• 2014 send em Kleinknecht seine Bilder en dr Maultaschen-Manufaktur z Berlin ausgstellt worra.
• 2015 hot a Ausstellong mit Kleinknecht-Bilder z Dannenwalde en dr Kirche am Weg staddgfonda.
• Vom 27. April bis zom 21. Mai 2017 hot em Alda Rothaus vo Maichenga a Ausstellong mit Ölbilder, Aquarell ond Zoichnonga vom Alfred Kleinknecht staddgfonda, wo Dorfoosichda ond Landschafda vo Maichenga, Magstadt, Deffenga, Sendlfenga ond vom Schwarzwald zeigt worra send.

A kloina Auswahl vo seine Werk

• Blumenkrüglein
• Maichinger Kirche
• Pfingstrosen in Kugelvase
• Am Döffinger Wald
• Tulpen in gelber Vase
• Sindelfinger Hexensprung
• Sindelfinger Fachwerkhäuser
• Am Bach
• Remstal – Im Weinberg
• Felder im Frühling

Uff a baar Bilder, wo em Dridda Reich entstanda send, siht mr leere Fahnastanga, was laut em Kleinknecht seira Dochder en dera Zeit ibrhaupt et iblich gwäa ischt. Drom enterprediirt se des als vorsichdiga Prodescht gega da Nazionalsozialismus.

Quella

• Inge Kleinknecht-Dehmel: Der genaue und liebevolle Blick zurück, an Ardikl en dr Sendlfenger Zeidong/Beblenger Zeidong vom 19. April 2017, S. 15.
• Ausfihrlicher Lebenslauf bei dr Ausstellong Nr. 5.

Weblink

• An Ardikl en dr Beblenger Kreiszeidong ibr d Ausstellong vom Johr 2017 em Alda Rothaus vo Maichenga