Amalie Halter-Zollinger

Dialäkt: Züritüütsch

D Amalie Halter-Zollinger (* 15. Juni 1892 z Humbrächtike, † 27. April 1985 ebd.) isch e bekannti Schriftstelleri us em Züripiet gsi.

Läbe

Fascht s ganz Läbe hät d Amalie Halter z Humbrächtige im gliiche Huus, grad näbed de Chile im obere Dörfli, gläbt, im Huus wo si uf d Wält choo isch. Erscht wo si 1975 is Altershäim isch, hät si ires Geburtshuus verlaa. Zu gwüsse Ziite händ vier Generatione vo de Familie deet gwont. Ire Vatter, de Carl Zollinger isch Uuremacher gsi und hät i de grosse Stube näbet em Chachelofe zue gschaffet. Bis an zwäite Wältchrief ane hät d Amalie Halter im Huus en Spezereilade gfüert.

Erscht wo si öppe füfzgi gsi isch, hät d Amalie Halter gmärkt, das si guet cha schriibe. Si hät aagfange churzi Gschichtli für Ziitige schriibe. Immer hüüffiger sind Lüüt vom Radio cho, will si no schööns alts Züritüütsch gredt hät. Eis vo irne Büechli ghäisst drum au Was ich am Radio prichtet hän. I irne Gschichte verzellt si uf Hochtüütsch oder mäischtens uf Züritüütsch vor alem us Humbrächtike und de Umgäbig. Iri Ërinnerige gönd zum Täil zrugg bis is 18. Jarhundert. Debii isch es de Amalie Halter immer wichtig gsi, richtig Züritüütsch z schriibe. Drum häd si sich au ad Regle ghalte.

Wo 1960 d Chile vo Humbrächtike renoviert worden isch, häd mer au de Güggel und d Chugle uf em Turm neu vergoldet. I d Chugle hät mer es Tonband, Münze, en aktuelli Seeziitig und es Gedicht vo de Amalie Halter tue. S ghäisst De Chilegüggel und isch extra für dä Zwäck tichted worde.

Bibliografii

• Halter-Zollinger, Amalie: Großmutter erzählt. Stäfe, 1951.
• Halter-Zollinger, Amalie: Meeder tuusig Sprüchwöörter und es Püscheli alt Redesaarde / Gesammelt von Amalie Halter-Zollinger. Stäfe, [1952]. 39 S. Neuuflag: Meeder tuusig Sprüchwörter und alt Redesarte. Meile: Walter, 2000. ISBN 978-3-909149-43-8
• Halter-Zollinger, Amalie: Großmutter erzählt. 2. Bändchen. Stäfe, 1954.
• Halter-Zollinger, Amalie: Vo s Chäler Heiri. Stäfe, 1960.
• Halter-Zollinger, Amalie: Was ich am Radio prichtet hän. Stäfe, 1965.
• Walter, Chlaus: Hombrechtikon: Bilder us der Gmeind am Übergang vom Zürisee zum Oberland Zeichnet vom Chlaus Walter; Text Amalie Halter-Zollinger. Wolfhuuse: Walter, 1976. 72 S.
• Halter-Zollinger, Amalie: D Bääbe Schulthess macht käm Franzoos en Chuss: Geschichten und Gedichte. Stäfe: Rothenhäusler, 1992. 239 S. ISBN 3-907960-54-8
• Halter-Zollinger, Amalie: Humbrächtike / mit Zäichnige und ere Iiläitig vom Chlaus Walter. Meile: Walter, 1992. 3. Uufl. 80 S.
• Halter-Zollinger, Amalie: S Zinnchäntli. Meile: Walter, 2010. 2008 usegèè als Wienachtsbüechli vom Walter-Verlag und 2010 ergänzt / mit ere Furtsetzig verzellt vom Chlaus Walter. 47 S. ISBN 978-3-905908-01-5

Literatur

• Schmid, Therese: Amalie Halter-Zollinger, Erzählerin und Mundartdichterin. In: Pioniere aus Feldbach und Hombrechtikon: eine Publikation im Rahmen der Ausstellung im Dorfmuseum Stricklerhuus Hombrechtikon. Text: Patrick Kupper et al. Humbrächtike, 2001. – S. 26-29.
• Gedänktafle am Geburtshuus z Humbrächtike
• S Geburtshuus vo de Amalie Halter-Zollinger mit em ehemalige Lade (s underschti Bild)