Anitta

De Anitta isch e König vo Kanis/Nesa (Kültepe) um 1730 v. Chr gsii (mittleri Chronologii). Er gelt as de ersti Grosskönig vo de Hethiter.

Bronzedolch vom Anitta mitere Vergröösserig vo de Kailschrift, Museum för anatolischi Zivilisatione, Ankara

Öberlieferig

S wichtigste Zügnis isch de Anitta-Teggscht (CTH 1) wo im 16.Jh.v. Chr. uf althethitisch gschribe woren isch und as de ältist hethitischi Teggscht gelt. Dezue chunnt no e Dolch, wo im Palast vo de Oberstadt vo Kanis gfunde woren isch. Er trait en akkadischi Inschrift: »Palast vom König Anitta« (É.GAL A-ni-ta ru-ba-im). Dodemti isch biwise, as de Anitta e historische König vo Kanis gsii isch. Au Uurchunde vo de altassyrische Handelskolonie us Alişar Höyük nenet de Anitta und dem si rabi simmiltim („de Groos vo de Stege“) Peruwa Kammaliya.

s Lebe

Zentralanatolie zu de Zitt vom Anitta

De Anitta isch de Soo vom König Pitḫana von Kussara gsii. De het d Stadt Nesa eroberet, wo dozmool di s Handelszentrum vo Anatolie gsii isch. Wo de Anitta König woren isch, hett er Zalpa eroberet, e Stadt am Schwarze Meer. Drufabe hett de d Stadtt Ḫattusa bilageret und noch de erfolgriiche Iinaam d Stadt em Erdbobe gliichgmacht. Ahand vo archäologische Fünd cha die Zerstöörig is Joor 1728 v. Chr. datiert were.

Denoo het er Kanis bifestigt und uusbaut und under anderem e Zoo und meriri Temple uufbaut. Denn het er de König vo Salatiwara underworfe und de König vo Purusḫanda hett em drufabe e Szepter und Thron us Iise gschenkt. De Anitta hett sich ab denn de Titel Groosskönig trait.

Literatur

• Trevor Bryce: The Kingdom of the Hittites. Oxford University Press 1998, S. 37–43. ISBN 0-19-924010-8.

Weblinks

Anitta-Text bei Titus, Universität Frankfurt