Anna Vock

D Anna Vock, mer chännt si au unter em Pseudonym Mammina (* 13. Jänner 1885 z Anglike; † 14. Dezämber 1962 z Züri), isch e Schwyzer Aktivischti vu dr eerschte Lesbebeweegig gsii.

Lääbe

D Vock isch e Doochter vum Kaspar Leonz Vock un dr Katharina Vock geb. Steinmann gsii. Anne 1905, mit 20 Joor, isch si uf Züri zooge. Ab 1911 het si z München gläbt un noch ere Zyt z St. Galle isch si im Meerz 1916 fir ai Moonet wider retuur chuu uf Züri. Vu Meerz bis Juuli 2016 het si nomool z München gwoont, derno zytwyys au z Buggs SG un wider z Anglike. Ab 1921 het si, abgsää vu aim Joor z Winterthur 1927/28, derno bis zue irem Dood z Züri gläbt. Si het as Birochraft un as Verchaifer gschafft.

Im Summer 1931 hän si un iri Mitbewooneri Anna Sieber zäme mit dr Laura Fredy Thoma un ere vierte Frau, vermuetli d Fanny Eichenberger, in dr gmainsaame Woonig vu dr Wock un dr Sieber z Züri dr lesbisch Damenklub Amicitia grindet, am 5. Augschte 1931 hän si derzue ne Inserat im Tagblatt vu dr Stadt Züri ufgee. Am 6. Augschte 1931 het si dr Damenclub zum eerschte Mool effetli drofe im Reschtaurant zum Guldine Löie. Derwylscht d Thoma Bresidänti vum neie Klub wooren isch, isch d Vock Protokollfiereri woore. Iri Mitschrifte, wu si iber vyyl Joor uusfierli un detaildrei´gfiert het, sin hite wiichtig Quälle zue dr eerschte Lesbebeweegig in dr Schwyz. As Kuntaktadräss fir dr Club isch speeter e Boschtfach in dr Helvetiapost aagee woore. Im Spootjoor het si d Amicitia mit em Herrenclub Excentric zämegschlosse.

Bi dr Zytschrift Das Freundschaftsbanner, wu ab Jänner 1932 dur d Laura Thoma un dr August Bambula verlait wooren isch, het d Vock ab dr Umnännig in Schweizerisches Freundschaftsbanner 1933 d Ufgaab vu dr Rusgeeberi un Verleegeri ibernuu. In dr 1930er Joor het si d Zytschrift vor allem in d Kampf um d Strooffreihait vu dr Homosexualiteet im Rame vun eme neie Stroofgsetzbuech yygschalte. 1934 isch d Anna Vock ins Fyyr vu dr Skandaal-Bulewardzytig Scheinwerfer groote, wu in irem Laitartikel Nr.4/1934 iber dr Faasnetsball vum Fryndschaftsverband d Fraue Belaidigunge publiziert ghaa het. D Anna Vock het im Name vum Verband gege där Beriicht wäge Eerverletzug vim Beziirksgriicht Züri gchlagt, dodruf het dr Scheinwerfer d Anna Vock perseenli aagriffe, ire volle Name vereffetligt un bhauptet, si heeb zwoo Fraue gwaltsam aagriffe. Waarschyns het si wäg däne Luuge ire Aarbetsblatz verloore. Si isch as Bresidänti vu dr Zürcher Sekzioon zruggdrätte, isch aber Zäntraalbresidänti vum Schwyzer Fryndschaftsverband bliibe. Ne äänligi Kampagne geege si het s 1936 dur d Zytschrift Guggu gee.

1937 isch d Zytschrift in Menschenrecht umgnännt woore, d Redakzioon hän Manne ibernuu. D Vock het d Zytschrift no bis 1942 uusegee un verlait, d Zytschrift het aber noodisnoo alli wyyblige Abonnäntene verloore. Die finanziäll Kriis, wu doodermit chuu isch, het dr Karl Meier (mer het en gchännt as Rolf) gnutzt, go d Zytschrift zuen eme dezidiert schwuule Magaziin umzböue. Unter em neie Name Der Kreis isch si bis 1967 en internazionaal wiichtig schwuul Magaziin gsii.

Dr Vock isch s Uusschyyde us dr aktivistische Roll schwäär gfalle, si isch dr Beweegig un em Kreis aber als äng verbunde bliibe. Unter irem eemoolige Pseudonym Mammina isch si in dr Homophiilebeweegig e als rezipierti lesbischi Figuur bliibe, au wänn si nimi aktiiv gsii isch. Am 14. Dezämber 1962 isch si z Züri gstoorbe.

Weblink

• Anna Vock uf L-World - Das Wiki zur Lesbengeschichte der Schweiz