De Appu isch de Held vonere hurritische Gschicht, wo nöd ganz erhalten isch. De Tegscht isch i de Archiv vo de hethitische Hoptstadt Ḫattusa gfunde wore. D Gschicht foot dodemit aa, as gueti Mensche erhööt werid und schlechti wie Holz gfällt und goot den öbere zo de sexuelle Probleem wo de Appu mit sinere Frau hett und wiener doch no zwee Söö zügt, de „Böös“ und de „Recht“, wo sich um s Erb striitet.

d Gschicht vom Appu ändere

De Appu isch de riichst Maa vo de Stadt Šudul im Land Lulluwa, wo am Meer glegen isch. Di Obre vo Šudul gönd i siim Huus as Gäst und Fründe ii und uus und er hett aifach ales. Doch liidet er drunder, as er kai Soo und kai Töchter hett. Ond zo alem Übel machtem sini Frau no s Lebe schweer mit em Vorwuerf, er heb si no nie richtig dragnoo. Frustriert maint er: „Du bisch doch nume e gwönlichi Frau und waisch scho drumm gär nünt!“ Und wie gwonet, leget si sich mit mit de Chlaider und Stifel aaglait is Bett. Endli opferet er e wiisses Lamm em Sunegott. As e Jünglig bsuecht dee de Appu und rootet em vill z trinnge und tüchtig Sex mit sinnere Frau z haa. Da nützt und sini Frau werd schwanger und noch nüü Mönet bringt si e Bueb uf d Welt. D Hebamm setzt dee em Appu uf sini Chnüü und er gittem de Name „Böös“, well sini Vatergötter för een de schlecht Weg gsetzt hebid. Sini Frau bringt denn e zwaite Soo uf d Welt, woner „Recht“ nennt, well d Vatergötter för dee de recht Weg gsetzt hebid. Erwachse wore, trened si sich und de „Böös“ hindergoot siin Brüeder und werd Buur, de „Recht“ chunnt nume e mageri Chue öber. De Sunegott het s Verbärmst mitem „Recht“ und segnet dem sini Chue. Deno brecht de Teggscht ab.

En Bruchstugg vonere andere Tafle brichtet, wie de „Böös“ und de „Recht“ z Sippar wegeme Rechtshändel vor de Sunegott tretet. Well aber ann vo de Brüedere öber de Sunegott afoot flueche, maint dee, as d Ištar vo Ninive de Striit schlichte söll.

Möglicherwiis isch d Gschicht „De Fischer und d Chue“ e Fortsetzig vo dere Gschicht.

Internet ändere

Literatur ändere

  • Einar Schuler: Kleinasien. Die Mythologie der Hethiter und Hurriter, i: Hans Wilhelm Haussig: Götter und Mythen im Vorderen Orient. Ernst Klett Verlag, Stueggert 1965.
  • Gary M. Beckman: Hittite Birth Rituals. Harrassowitz, Wiisbade (1983). ISBN 3-447-02310-4.