Asine (Lakonie)

Asine (altgriech. Ἀσίνη) isch i de Antiki e chliises Stedtli am Lakonische Golf gsii, zwösched em Vorpirg Tainaron und de Hafestadt Gythion. D Laag isch nöd völlig gsicheret, s werd aber agnoo, as es süüdlich vom antike Las a de Bucht vo Skoutári glegen isch, wo späärlichi antiki Fund us de klassische und de röömische Zitt gmacht wore sind.

Gschicht

D Gründig vo Asine isch nöd klar, s werd aber vermuetet, as sich d Biwoner vo Asine do niderloo hend, nochdem dene sini Stadt vo Argos geg s Endi vom 8. Joorhundert v. Chr. völlig zerstört woren isch. D Spartaner, wo mit dene Asinäer verbündet gsii sind, hend dene nochem Erste Messenische Chrieg e Chüstestraiffe z Messenie ggee, wo si messenische Asine gründet hend.

Ane 424 v. Chr. hend d Athener im Peloponnesische Chrieg under de Füerig vom Nikias vo de Insle Kythera us di lakonischi Chüste aagriffe, debii o d Stedt Helos und Asine. Guet zwaihundert Joor spööter isch ane 219/8 v. Chr. im Makedonisch-Röömische Chrieg de makedonischi König Philippos V. miteme Heer bis as Vorpirg Tainaron zoge. Er hett Asine aagriffe, isch aber zruggschlage wore.

Lueg no

• Asine i de Argolis
• Asine z Messenie

Literatur

• Yves Lafond: Asine. In: Der Neue Pauly (DNP). Band 2, Metzler, Stuttgart 1997, ISBN 3-476-01472-X, Sp. 81.