Die Makedonisch-Römische Chrieg

As Makedonisch-Römischi Chrieg (au: Makedonischi Chrieg) bezäichnet mä die drei Usenandersetzige zwüschen em Römische Riich und em Antigonideriich Makedonie im 3. und 2. Joorhundert v. d. Z. In dere Zit isch Rom zur herrschende Macht über Griecheland worde.

Dr Erst Makedonisch-Römischi Chrieg

Rom und Makedonie si noch 229 v. d. Z. us zwäi Gründ politischi Gegner worde: Dr äint isch gsi, ass Illyrie e Protektorat vo Rom worde isch und dr anderi, ass dr Filipp V. vo Makedonie 215 e Bündnis mit em Hannibal, em Gegner vo Rom, abgschlosse het. Dr Erst Makedonisch-Römischi Chrieg isch vo 215 bis 205 v. d. Z. gange und het weenig veränderet.

Dr Zwäit Makedonisch-Römischi Chrieg

Im Zwäite Makedonisch-Römische Chrieg vo 200 bis 197 v. d. Z. het Makedonie d Hegemonii über Griecheland verloore. D Römer häi sich mit verschiidene griechische Middelmächt verbündet, wo de Makedonier findlig gsi si. 196 isch dr Filipp schliesslig zum ene Friidensschluss zwunge worde. Er het drbii goossi territoriali Verlust gmacht, isch aber au zum römische Alliierte worde. Rom het Griecheland für frei erkläärt und sich us em Balkan zruggzooge.

Dr Dritt Makedonisch-Römischi Chrieg

Spööter häi d Römer iiri Politik gegenüber Griecheland verscherft, und am Ändi vom Dritte Makedonisch-Römische Chrieg (171–168 v. d. Z.) isch s makedonische Köönigdum under em Soon vom Filipp, em Perseus, vernichdet gsi.

Dr Viert Makedonisch-Römischi Chrieg

Im Joor 151 het sich dr Andriskos, wo behauptet het, är sig dr Soon vom Perseus, zum Köönig vo Makedonie erkläärt. Im Vierte Makedonische Chrieg (150-148 v. d. Z.) het dr Quintus Caecilius Metellus dr Andriskos schliesslig im Joor 148 gfangegnoo und uf Rom spediert. Zwäi Joor spööter häi d Römer dr Andriskos hiigrichdet und us Makedonie e römischi Browinz gmacht, wo si sälber diräkt regiert häi.