Perseus, Köönig vo Makedonie

Dr Perseus (altgriech. Περσεύς, *; um 213/212 v. d. Z.; † um 165 v. d. Z. z Alba Fucens) isch dr letscht Köönig vo dr Dünastii vo de Antigonide gsi, wo dr Diadochestaat Makedonie regiert het, wo noch em Dood vom Alexander em Groosse entstande isch. Er het d Schlacht vo Pydna am 22. Juni 168 v. d. Z. gege d Römer verlore und Makedonie isch denn under die römischi Herrschaft choo.

Tetradrachme mit ere Daarstellig vom Perseus, im Britische Museum

Lääbe

Dr Köönig Filipp V. vo Makedonie het e prorömische Soon, dr Demetrius, ghaa. Dr Perseus isch iifersüchtig gsi uf dä, wil er as Gsandte z Rom erfolgriich gsi isch, und er het sim Vater iigreedet, ass si Brueder chönnt Usurpator wärde und er dorum müess stärbe. Dr Filipp het dr Demetrios lo vergide und isch e Joor spööter, 179 v. d. Z. sälber gstorbe. Bi de Römer, wo dr Demetrius vorzooge gha häi, isch dr Perseus wäge sinere Rolle bim Dood vo sim Brueder nit beliebter worde, au nit, won er uf e Droon gstiige isch.

Öbbis vom erste wo dr Perseus as Köönig gmacht het, isch d Ernöijerig vom Verdraag mit Rom gsi. Was er denn aber gmacht het, het d Römer aber beunrueigt: Er het sich in d Aagläägehäite vo sine Noochbere iigmischt, isch bewaffnet z Delfi erschiine, het dr römisch Gsandti in Makedonie uf dr Site gloo, und het e dünastischi Hüroot abgschlosse. Bald isch zwüsche Rom und Makedonie Chrieg usbroche, und dä het mit dr Niiderlaag vom Perseus in dr Schlacht vo Pydna gändet, wo sich dr Perseus em Lucius Aemilius Paullus Macedonicus underworfe het. Er isch denn woorschinlig z Alba Fucens iigsperrt worde, d Römer häi s Köönigriich vo de Antigonide ufglööst und us em vier Republike gmacht.

Dr Perseus isch mit dr Laodike, ere Dochder vom Köönig Seleukos IV., verhürootet gsi. Si häi e Soon gha, dr Filipp, wo zämme mit sim Vater iigspert worde isch. E Generazioon spööter het dr Andriskos behauptet, er sig e Soon vom Perseus und het sich zum Köönig erhoobe. D Römer häi sinere Rebellion 146 v. d. Z. en Ändi gmacht und druf die römischi Browinz Macedonia iigrichdet.

Dr Poseidonios verzelt, ass dr Perseus d Rose in Griecheland iigfüert häig.

Vorgänger Philipp V.

Köönig vo Makedonie 179–168 v. d. Z.

Nochfolger ---

Dä Artikel basiert uff ere fräie Übersetzig vum Artikel „Perseus_(Makedonien)“ vu de dütsche Wikipedia. E Liste vu de Autore un Versione isch do z finde.