Astrid Epiney

D Astrid Epiney (* 9. Juuli 1965 z Mainz as Astrid Wander) isch e dytsch-schwyzerischi Räächtswisseschaftleri un Hoochschuelleereri.

d Astrid Epiney (2015)

Lääbe

D Epiney het an dr Uniwersiteete Mainz un Lausanne Räächtswisseschafte studiert un het anne 1989 z Mainz mit em Eerschte Jurischtische Staatsexaamen un 1991 z Lausanne mit em Lizenziaat abgschlosse. Im nämlige Joor isch si bim Eckart Klein z Mainz mit ere Dissertazioon iber „Die völkerrechtliche Verantwortlichkeit von Staaten für rechtswidriges Verhalten im Zusammenhang mit Aktionen Privater“ bromewiert woore. Anne 1992 het si am Europäische Hoochschuelinschtitut z Floränz mit dr Aarbet „Der Stellenwert des Europäischen Gemeinschaftsrechts in Integrationsverträgen“ s Diploom iber verglyychendi europäischi un internazionaali Räächtsstuudie (Master of Laws) gmacht. Im Joor 1994 isch d Epiney bim Klein z Mainz mit dr Schrift „Umgekehrte Diskriminierungen. Zulässigkeit und Grenzen der discrimination à rebours nach europäischem Gemeinschaftsrecht und nationalem Verfassungsrecht“ fir Staatsräächt, Velkerräächt un Europaräächt habilitiert woore.

Im Septämber 1994 isch si assoziierti un 1996 oordeligi Brofässeri fir Velkerräächt, Europaräächt un schwyzerisch effetli Räächt an dr Uniwersiteet Fryybùùrg woore. Syter 1995 isch si gschäftsfierendi Diräkteri vum Inschtitut fir Europaräächt vu dr Uniwersiteet. Vu 2005 bis 2007 isch si Diräkteri vu dr Räächtswisseschaftlige Fakulteet un vu 2007 bis 2011 Vizeräkteri gsii. Fir d Amtszyt vum 15. Meerz 2015 bis 14. Meerz 2019 isch si zur Räkteri vu dr Uniwersiteet Fryybùùrg gweelt woore. Bi dr Waal zur zwoote Amtszyt (2019–2023) het si d Epiney gege iri Kunkerränti Bernadette Charlier Pasquier chenne duuresetze. Im Februar 2024 het si ire Amt an d Chemybrofässeri Katharina Fromm ibergee.

As Fachredakteri vu dr jurischtische Fachzytschrift Jusletter isch si verantwoortli fir s Biet vum Europaräächt. Syter 2012 isch Epiney gschäftsfierendi Rusgeeberi vu dr Zeitschrift für Europäisches Umwelt- und Planungsrecht. Vu 2012 bis 2015 het si dr Schwyzerisch Wisseschafts- un Innovazioonsroo (SWIR; bis 2014 het er „Schweizer Wissenschafts- und Technologierat SWTR“ ghaiße) bresidiert.

D Epiney isch anne 1995 mit em Nazionaale Latsis-Bryys vum Schwyzerische Nazionaalfond uuszaichnet woore. Im Joor 2011 isch si zur Ritteri vu dr Eerelegioon gschlaa woore. 2023 isch si mit em Bundesverdienschtchryz 1. Klasse vu dr Bundesrepublik Dytschland uuszaichnet woore.

D Epiney isch ghyroote un het zwai Chinder.

Weblink

• Literatur vu un iber Astrid Epiney im Katalog vu dr Dütsche Nazionalbibliothek
• d Astrid Epiney uf dr Websyte vu dr Uniwersiteet Fryybùùrg

Fueßnote

Dä Artikel basiert uff ere fräie Übersetzig vu dere Version vum Artikel „Astrid_Epiney“ vu de dütsche Wikipedia. E Liste vu de Autore un Versione isch do z finde.