D Balkanfäldzüüg vom Maurikios

D Balkanfäldzüüg vom Maurikios si e Serii vo Fäldzüüg gsi, wo dr oströmisch Kaiser Maurikios (reg. 582–602) undernoo het, zum die oströmische Balkanbrowinze gege d Aware und d Slawe verdäidige.

S oströmische Riich vo öbbe 526–600

Dr Maurikios isch näben em Anastasios I. (491 bis 518) dr äinzig spootantiki Kaiser, wo im Raame vo sine Mögligkäite e konsequänti Balkanbolitik driibe het und dr Sicherig vo dr Nordgränze vom Riich gege d Iifäll von Völker us em Barbaricum die nötigi Ufmerksamkäit gschänkt het. In dr zwäite Helfti vo sinere Regierigszit (vo 591 aa) si si dank eme Friide mit Persie dr Schwerpunkt vo sinere Ussebolitik und dütlig erfolgriicher gsi as vorhär.

D Aanaam, ass d Fäldzüüg vom Maurikios uf em Balkan nume e letschts Ufböime gsi sige, isch zwar wit verbräitet aber falsch, wie au ass die römischi Herrschaft uf em Balkan sofort noch em Sturz vom Maurikios 602 zämmebroche sig.

Dr Maurikios isch zletscht uf guetem Wääg gsi, d Landnaam vo de Slawe uf em Balkan z verhindere und die spootantiki Ornig uf em Balkan z verdäidige. Er het mit sine lange Fäldzüüg Erfolg ghaa, abgsee vom ene Ruggschlaag 597/598. Es isch s bolitische Duurenander noch sim Sturz gsi, wo si Wärk vernütiged het. Wemm mä zruggluegt isch das s Ändi gsi vo de römische Abweerfäldzüüg gege d Barbare am Rhii und an dr Donau gsi, wo wäärend Joorhunderte gfüert worde si. Mindestens wo sich s um d Slawe ghandlet het, isch s e Kampf gegen e nitstaatligi Bedrooig gsi und d Chriegsfüerig asümmetrisch. Schlussändlig Im Ergebnis het dr Maurikios und villicht au si Noochfolger Phokas die slawischi Landnaam für über zwäi Joorzäät uusegschoobe.

Liddratuur

Kwelle

• Maurice’s Strategikon. Handbook of Byzantine Military Strategy. Übersetzt von George T. Dennis. University of Pennsylvania Press, Philadelphia 2001, ISBN 0-8122-1772-1 (Noochdruck vo dr Usgoob Philadelphia 1984).

Sekundärliddratuur

• Florin Curta: The Making of the Slavs. History and Archaeology of the Lower Danube Region, c. 500–700. Cambridge University Press, Cambridge u. a. 2001, ISBN 0-521-80202-4 (Cambridge Studies in Medieval Life and Thought. Ser. 4, 52).
• Edgar Hösch: Geschichte der Balkanländer. Von der Frühzeit bis zur Gegenwart. 2. durchgesehene und erweiterte Auflage. Beck, München 1993, ISBN 3-406-37381-X (Beck's historische Bibliothek).
• Franz Georg Maier (Hrsg.): Byzanz. Fischer-Taschenbuch-Verlag, Frankfurt am Main 1973, S. 139ff. (Fischer Weltgeschichte 13).
• John Julius Norwich: Byzanz. Aufstieg und Fall eines Weltreichs. Propyläen, Berlin u. a. 2002, ISBN 3-549-07156-6.
• Walter Pohl: Die Awaren. Ein Steppenvolk in Mitteleuropa 567 – 822 n. Chr. 2. aktualisierte Auflage. Beck, München 2002, ISBN 3-406-48969-9 (Frühe Völker).
• Michael Whitby: The Emperor Maurice and his Historian. Theophylact Simocatta on Persian and Balkan Warfare. Clarendon Press, Oxford u. a. 1988, ISBN 0-19-822945-3 (Oxford Historical Monographs).

Weblingg

• Uszug us em Gschichtswärk vom Theophylaktos Simokates (änglischi Übersetzig)

Fuessnoote

Dä Artikel basiert uff ere fräie Übersetzig vu dere Version vum Artikel „Balkanfeldzüge_des_Maurikios“ vu de dütsche Wikipedia. E Liste vu de Autore un Versione isch do z finde.