Barbara Bleisch

D Barbara Bleisch (* 1973 z Baasel) isch e Schwyzer Filosoofi, Moderatoori, Autoori, Rusgeeberi un freii Schurnalischti.

Lääbe un Wiirke

D Barbara Bleisch het vu 1994 bis 2001 Filosofy, Germanischtik un Religioonswisseschafte an dr Uniwersiteete Züri, Baasel un Dibenga studiert. Anne 2007 isch si am Eetik-Zäntrum vu dr Uniwersiteet Züri in Filosofy zum Thema Pflichten auf Distanz. Weltarmut und individuelle Verantwortung promowiert woore. Vu 2002 bis 2012 het d Bleisch as wisseschaftligi Mitarbaiteri am Eetik-Zäntrum vu dr Uniwersiteet Züri gschafft, unter anderem isch s vu 2005 bis 2009 Stuudie- un Gschäftslaiteri vu dr Noodiploomstuudiegäng Advanced Studies in Applied Ethics (ASAE) gsii, wu si allno no as Dozänti din schafft.

Vu 2012 bis 2015 isch d Bleisch an dr Uniwersiteet Bärn wisseschaftligi Mitarbaiteri im Projäkt Gründe der Parteilichkeit – Zur Ethik der Familienbeziehungen gsii, wu vum Schwyzerische Nazionaalfond gfeerderet wooren isch. 2014 isch si Senior Research Fellow an dr Queen’s University Belfast gsii. Vu 2017 bis 2019 isch d Bleisch akadeemische Gascht am Collegium Helveticum vu dr Uniwersiteet Züri, dr ETH Züri un dr Zürcher Hoochschuel vu dr Chinscht gsii. Syter anne 2020 isch d Bleisch wider wisseschaftligi Mitarbaiteri am Eetik-Zäntrum vu dr Uniwersiteet Züri.

In ire Aabete zue dr Bezieig zwische Eltere un Chinder duet si em «transakzionaale Modäll» vun ere Verbfliichtig vu dr Chinder gegeniiber dr Eltere, wu Schuld un Dankbarkait basiert, e «relazionaal Modäll» entgeegesetze: Chinder hän zu ire Eltere, wie au umgcheert, e bsunderi Bezieig vum wägselsytige Wisse, vum Verdröue un vum emozionaale Uusgliiferetsyy. Doodrus entwicklet si au ne bsunderi geegesytigi Verantwortig. Die isch aber, im Geegesatz zum transakzionaale Modäll, geegesytig – au Eltere hän lääbeslangi Verantwortig fir iri Chinder.

Zäme mit dr Räächtsbrofässeri Andrea Büchler het d Bleisch 2020 s Buech Kinder wollen. Über Autonomie und Verantwortung uusegee. Doodin versueche si, ne Neibstimmig vu dr «reproduktiive Autonomy» vu Fraue voorzleege vor em Hintergrund vum tächnoloogische Wandel.

Näbe ire wisseschaftligen Aarbet duet d Bleisch syt 2010 reegelmääßig d Diskussioonssändig Sternstunde Philosophie bi SRF 1 moderiere. As Schurnalischti schafft si fir d Züri-Zytig. Anne 2004 het si as Schurnalischti fir SolidarMed z Lesotho gschafft un e Praktikum bi dr UNO z New York gmacht. Vu 2013 bis 2019 isch si Kolumnischti bim Philosophie Magazin z Berlin gsii. Vu 2018 bis 2023 het si as Kolumnischti fir dr Tagi/Der Bund gschriibe.

Fir iri schurnalistisch Aarbet isch si 2017 un au 2018 mit em zweete Blatz in dr Kategory «Kultuur» im Ranking «Journalisten des Jahres» vu dr Zytschrift Schweizer Journalist uuszaichnet woore. 2020 isch d Bleisch in dr Kategory «Gsellschaft» as Schurnalischti vum Joor uuszaichnet woore.

D Bleisch het vu 2015 bis 2022 dr Jury vum «Tractatus-Bryys fir filosoosfischi Essayischtik» aagheert.

Syter 2019 moderiert d Bleisch s renommiert «Café Philo» im Literaturhuus Hamburg im Turnus mit em Wolfram Eilenberger.

Ab 2024 ibernimmt d Bleisch s Amt vu dr Intendanti vu dr Bachstiftig St. Galle.

D Bleisch isch Mitgliid vu dr International Development Ethics Association (IDEA) gsii un Voorstandsmitgliid vu dr entwickligsbolitische NGO „Erkleerig vo Bärn“. Si isch Mitgliid vu dr GAP (Gesellschaft für analytische Philosophie) un dr SWIP (Society for Women in Philosophy).

D Bleisch het zwoo Deechtere un läbt mit ire Familie z Züri.

Uusglääseni Schrifte

• mit em Markus Huppenbauer un em Christoph Baumberger: Ethische Entscheidungsfindung: Ein Handbuch für die Praxis. Versus, Zürich 2021, ISBN 978-3-03909-309-0.
• mit dr Andrea Büchler: Kinder wollen. Über Autonomie und Verantwortung. Hanser, München 2020, ISBN 978-3-446-26575-2.
• Warum wir unseren Eltern nichts schulden. Hanser, München 2018, ISBN 978-3-446-25831-0.
• mit dr Monika Betzler: Familiäre Pflichten. Suhrkamp, Berlin 2015, ISBN 978-3-518-29720-9.
• mit em Christoph Ammann un dr Anna Goppel: Müssen Ethiker moralisch sein? Essays über Philosophie und Lebensführung. Campus, Frankfurt am Main 2011, ISBN 978-3-593-39613-2.
• Pflichten auf Distanz: Weltarmut und individuelle Verantwortung. De Gruyter, Berlin 2010, ISBN 978-3-11-022825-0 (Dissertation, Universität Zürich, 2007).
• mit em Peter Schaber: Weltarmut und Ethik. Mentis, Paderborn 2007, ISBN 978-3-89785-312-6.
• mit dr Ursula Renz: Zu wenig. Dimensionen der Armut. Seismo, Zürich 2007, ISBN 978-3-03777-050-4.
• mit dr Jean-Daniel Strub: Pazifismus: Ideengeschichte, Theorie und Praxis. Haupt, Bern 2006, ISBN 3-258-06947-6.

Weblink

• Websyte vu dr Barbara Bleisch
• Barbara Bleisch in dr Internet Movie Database

Fueßnote

Dä Artikel basiert uff ere fräie Übersetzig vu dere Version vum Artikel „Barbara_Bleisch“ vu de dütsche Wikipedia. E Liste vu de Autore un Versione isch do z finde.