Baudonivia

e Chlooschterfrau und Gschichtschriiberi

D Baudonivia isch im früene Mittelalter e fränkischi Chlooschterfrau und Gschichtschryberin im Heiligchrüüzchlooschter bi dr Stadt Pictavium, em hütige Poitiers, gsi.

Si het i dr Zyt vom spoote sächste bis zum früene sibete Joorhundert gläbt, gnauer weiss me s nit. Si isch d Priorin vom Chlooschter gsi, wo vo der heilige Radegund gründet worden isch. D Baudonivia het als jungi Chlooschterfrau die berüemti Persoon no leere könne.

Vo dr Baudonivia git’s Büecher, wo si gschribe het; si isch drmit eini vo den eerschte Chlooschterfraue, wo me vonne literarischi Wäärch het. Die bekantischti vo iirne Schrifte isch d Läbensgschicht vo dr Radegund, wo si drin uf Gheiss vo dr Äptissin Dedimia em Venantius Fortunatus sini erschti Schrift über die bedütendi Frau wyterfüert und prezisieert. Dr Baudonivia vrdanke mer s meischte, wo me vo dr Radegund iirere Leischtig fürs Heiligchrüüzchlooschter weiss.

Anderi Sache het si für d Schuel gschribe, öppen e nöji Fassig vom Isidor vo Sevilla sym Lexikon Etymologiae und au en Abschrift vom Euklid synen Elemänt. D Chlooschterfrau vo Pictavium isch eini vo dene Persoone, wo me ne im Land Akwitanie no s Wyterläbe vo der antike Kultur verdankt het.

Bi de Sproochforscher het men usegfunde, ass die guet usbildeti Chlooschterfrau im dozmol aktuelle wyter entwicklete Latyn mit scho richtig romanische Wändige, also vilicht mit Forme im Dialäkt vo iirere Region gschribe het und sech au ür die keltischi Sprooch inträssiert het. Dr Roger-Xavier Lantéri seit vonnere: «Baudonivie peut donc être fêtée vraiment comme la doyenne des écrivaines françaises,» is Dütschen übertreit: «D Baudonivia cha me würklech als erschti französischi Autoorin fyyre.»

Der fränkische Chlooschterfrau iire Name chunt au uf em berüemte frauegschichtliche Kunschtwäärch The Dinner Party vo dr Judy Chicago im Brooklyn Museum z Nöi York vor.

Literatur ändere

  • Claudio Leonardi: Baudonivie la biographe. In: La vie quotidienne des femmes au Moyen Âge. Hachette, 1997.
  • Yvonne Labande-Mailfert: Vie de sainte Radegonde par la moniale Baudonivie. In: R. Favreau: Radegonde de la couronne au cloître. Poitiers 2005, S.59-85.
  • Louise Coudanne: Baudonivie, moniale de Sainte-Croix et biographe de sainte Radegonde. In: Études mérovingiennes. Actes des Journées de Poitiers 1er-3 mai 1952, Paris 1953, S.45-51.
  • Roger-Xavier Lantéri: Baudonivie. In: Les Mérovingiennes 476-714. Paris 2000, S.42-49.

Weblink ändere

  • Sylvie Joye: Baudonivie. In: Dictionnaire des femmes de l'Ancien Régime, 2008.