D Belaagerig und Erooberig vo Jerusalem im Joor 1099

D Belaagerig vo Jerusalem het im Raame vom Erste Chrüzzuug vom 7. Juni bis 15. Juli 1099 stattgfunde.

D Belaagerig und Erooberig vo Jerusalem im Joor 1099
Deil vo: Erste Chrüzzuug
D Erooberig vo Jerusalem 1099. Im Hindergrund d Passion Christi. Daarstellig um 1300
Datum 7. Juni–15. Juli 1099 Ort Jerusalem Usgang Siig vo de Chrüzfaarer
Konfliktparteie
Krüzfaarer	Fatimide
Befählshaber
Robert vo Flandere Gióttfried vo Bouillon Robert vo dr Normandii Raimund IV. vo Toulouse	Iftikhar ad Daula (dr Kommandant vo Jerusalem)
Truppesterki
1.500 Ritter 12.000 Fuesssoldate	umbekannt
Verlust
umbekannt	umbekannt

Vorgschicht

Im 11. Joorhundert häi muslimischi Herrscher underander um d Vorherrschaft in dr Regioon kämpft und immer wider emol si au Christe zwüsche d Fronte choo. Wo 1098 Jerusalem vo de schiitische Fatimiide under em al-Afdal Schahanschah erooberet worde isch, sige in ere äinzige Nacht über 3'000 sunnitischi Muslim, Juude und Christe umchoo. Churz vorhär häi d Chrüzfaarer Antiochia erooberet, und si bald druf gege Süüde zooge.

D Belaagerig und Erooberig vo Jerusalem

D Chrüzfaarer si schlächt organisiert gsi und iiri Aafüerer si nid mitenander uschoo und wo si am 7. Juni z Jerusalem aachoo si und mit dr Belaagerig vo dr Stadt aagfange häi, het s ene öbbe an allem gfeelt. D Muslim und d Juude in dr belaagerete Stadt — d Christe het dr fatimidisch Statthalter vorhär us dr Stadt verdriibe — häi mee zum Ässe und Drinke gha und vo de 7'000 Ritter am Aafang vom Chrüzzuug si no 1'500 öbrig bliibe, ubd vo 20'000 Fuessoldate no 12'000. E Sturmaagriff isch abgweert worde und d Chrüzfaarer häi druf Holz us Samarie brocht und Belaagerigsmaschiine afo baue. Die si am 14. Juni fertig worde und am Daag druf si d Chrüzfaarer in d Stadt iidrunge und häi fast alli Iiwooner umbrocht. Dr Tankred, en Aafüerer vo de italiänische Normanne, het zwar brobiert e baar Muslim in sim Kwardier z beschütze, aber au die si ermordet worde. Dr fatimidisch Statthalter het sich in Davidsdurm zruggzooge. Won em freije Abzuug versproche worde isch het er dr Durm im Groof Raimund vo Toulouse übergee und isch mit sinere Liibwach uf Askalon. Si si die äinzige Muslim gsi, wo lääbig drvoo choo si. Au e baar Juude häi s Masaker überläbt und si us dr Stadt gflüchdet.

Arabischi Kwelle reede vo 30'000 bis 70'000 Dote, aber mä nimmt aa, dass daas stark überdriibe isch.

D Folge

D Entdeckig vom Häilige Chrüz; Grafik vom Gustave Doré

Noch dr Erooberig het mä im Raimund d Chöönigschroone aabote, aber dä het nid welle und gsäit, ass er in dr Stadt, wo dr Jesus Christus d Dornechroone drait het, kä Köönigschroone well drääge. Dr Gottfried vo Bouillon het denn am 22. Juli as Princeps d Herrschaft über Jerusalem übernoo. Am 12. August het dr Gottfried en Armee und vorus s Häilige Chrüz in d Schlacht vo Askalon gfüert und d Fatimide gschlaage. Die mäiste Chrüzfaarer häi druf dänggt, ass si iiri Glübd erfüllt häige und si häim gange.

Litratuur

• Guy Lobrichon: Die Eroberung Jerusalems im Jahre 1099. Thorbecke, Sigmaringe 1998, ISBN 3-7995-0093-6.
• Hans Eberhard Mayer: Geschichte der Kreuzzüge. 10. Uflaag. Kohlhammer, Stuttgart 2005, ISBN 3-17-018679-5
• Jonathan Riley-Smith: The First Crusade and the Idea of Crusading. Continuum, London 2003, ISBN 0-8264-6726-1.
• Peter Thorau: Die Kreuzzüge. C.H.Beck, Münche 2004, 4. Uflaag 2012, ISBN 978-3-406-50838-7.
• Nikolas Jaspert: Die Kreuzzüge. Wissenschaftliche Buchgesellschaft, Darmstadt 2003, ISBN 3-534-15129-1.

Weblingg

 Commons: D Belaagerig vo Jerusalem – Sammlig vo Multimediadateie

• D Belaagerig und Erooberig vo Jerusalem: Gsammleti Bricht Hauptkwelle us em Internet Medieval Sourcebook.
• Höhepunkt des Ersten Kreuzzugs Studie vom J. Arthur McFall, wo ursprünglig in dr Zitschrift Military History erschiine isch.