Bikini-Atoll

S Bikini-Atoll isch e Inselgrupp im Pazifische Ozean. S ghert mit sine insgsomt 23 Insle zue de Marshallinsle. D Londmass vun alle zugherige Insle isch 6,01 km². D umschlosse Lagun isch 594,14 km² gross. Di greschte Insle sin Bikini, Eneu, Eninman un Nam.

Bikini Atoll - NASA NLT Landsat 7 (Visible Color) Satellite-Bild

Im Johr 2003 hen 167 Ywohner uf de Insle glebt. Alli ondri Urywohner sin uf diverse ondre Insle vum Marshall-Archipel verteilt.

Gschicht

D Insle sin anno 1600 vun de Spanier beoschprucht worre un sin später on d Ditsche gonge, Wil s Atoll im trockenere Norde vum Marshall-Areal leit, sin d Urywohner numme sehr selte in Kontakt mit de Kolonialherre kumme. Wege dem isch bis hit de familiär un ethnisch Zommehalt vun de Bikinianer no sehr stark usgprägt.

D Insle sin 1825 durich de Otto von Kotzebue widerentdeckt worre un zue Ehre vun sinem Schiffsarzt Johann Friedrich Eschscholtz Eschscholtz-Insle gnennt worre. Sit 1886 sin d Insle unter ditschem Schutz gschtonde.

Erscht wu d Japaner am Ofong vum 20. Jahrhundert d Verwaltung ibernumme hen un Militär]yrichtunge ufbout hen, isch de Kontakt enger worre.

Wu d Marshallinsle 1944 im Pazifikkrieg vun de Amerikaner erobert worre sin, hen sich numme no fimf Japaner uf eire vun de Bikini-Insle versteckt gha. Zum nit in amerikanischi Gfongeschaft z kumme, hen se sich in eme kleine Erdloch versteckt un drno mit ere Granat in d Luft gschprengt.

Kernwaffeteschts

Noch em End vum Zweite Weltkrieg hen d Vereinte Natione bschlosse, dass d Nutzung vun Gebiet vun de Marshall-Insle fir s Sicherheitsbedirfnis vun de USA keinerlei Bschränkunge unterliege. So isch s Bikini-Atoll un s Eniwetok-Atoll vun de Amerikaner fir Kernwaffeteschte usgsuecht worre. Während de Teschtserie vun iber 60 Atombombeversuech sin rund 42.000 amerikanischi Techniker, Wissenschaftler un Militärs uf Bikini schtationiert gsi. D Urywohner sin uf di sydeschtliger Insel Rongerik umgsidelt worre.

S Rongerik-Atoll isch aber vun de Versorgungssituation her fir die Bikinianer e absoluts Fiasko gsi. Noch eme Johr hen se on Unterernährung glitte un s negativ Echo in de Weltpress het d USA 1948 zue re erneijte Umsidlung vun de Bikinianer noch Kwajalein zwunge. Dert hen si fir e halb Johr in Zelt direkt nebe de Gebäude vum Flughafe ghuust. Schlussendlig sin si uf de Insel Kili ogsiedelt worre, wo mit Hilf vun de amerikanischi SeaBees s Land bewohnbar gmacht worre isch un d Bikinianer ihri Hitte bout hen.

Crossroads-Baker im Bikini-Atoll. Vore links isch de Flugzygträger USS Saratoga (CV-3) mit lichter Schlagsyte z sehne. Der isch deno gsunke.

Ibersicht vun de wichtigschte Teschts

Operation Crossroads

Bomb	Datum	Ort	Schprängkraft
Able	22:00:34 30. Juni 1946 (GMT)	Bikini-Atoll Lagun	23 Kt
Baker	21:35:00 24. Juli 1946 (GMT)	Bikini-Atoll Lagun	23 Kt

Operation Castle

Bomb	Datum	Ort	Schprängkraft
Bravo	18:45:00.0 28. Februar 1954 (GMT)	Nam Insel	15 Mt
Romeo	18:30:00.4 26. März 1954 (GMT)	Nam Insel	11 Mt
Koon	18:20:00.4 6. April 1954 (GMT)	Eninman Insel	110 kt
Union	18:10:00.7 25. April 1954 (GMT)	Bikini Lagun	6,9 Mt
Yankee	18:10:00.1 4. Mai 1954 (GMT)	Bikini Lagun	13,5 Mt
Nectar	18:20:00.4 13. Mai 1954 (GMT)	Bikini Lagun	1,69 Mt

Während em Castle-Bravo Tescht isch s durich falschi Wetteriischätzunge vun de Militärmeteorologe zue re Kontamination vun de Insle Rongelap un Rongerik durich Fallout kumme. D Insle sin zue dem Zytpunkt bewohnt gsi. Au uf em Meer isch e japanischs Fischerboot, d Daigo Fukuryumaru ("Glicklicher Drache Nr. 5"), betroffe gsi, un e Bsatzungsmitglid isch on de Folge gschtorbe.

Operation Redwing

Redwing-Dakota us de Luft fotografiert

Bomb	Datum	Ort	Schprängkraft
Cherokee	17:51 20. Mai 1956 (GMT)	Namu Insel - B-52 Abwurf	3,8 Mt
Zuni	17:56.00.3 27. Mai 1956 (GMT)	Eninman Insel	3,5 Mt
Flathead	18:26 11. Juni 1956 (GMT)	Bikini Lagun	365 kt
Dakota	18:06 25. Juni 1956 (GMT)	Bikini Lagun	1,1 Mt
Navajo	17:56.00.3 10. Juli 1956 (GMT)	Riff zwische Namu un Yurochi Insel	5 Mt
Tewa	17:46.00.0 20. Juli 1956 (GMT)	Riff zwische Namu un Yurochi Insel	5 Mt

Alli Bombenome sin au Nome vun amerikanischi Indianerschtämm.

Operation Hardtack I

Bomb	Datum	Ort	Schprängkraft
Juniper	04:20 22. Juli 1958 (GMT)	Bikini-Atoll	65 kt

Start vun Rakete

Zuer Untersuechung vun Fallouts sin 1956 bi 11°35' nerdligi Breit un 165°20' eschtligi Läng zahlriichi Rakete vun de Type Loki un Asp vum Bikini-Atoll us gschtartet woore.

D witer Gschicht

Bikini-Atoll (ufgnumme usm Weltall)

Wu am End vun de 1960er-Johr s Bikini-Atoll wider fir d Bikinianer freygebe worre isch, het mit eme 8-Johresplan d Besidlungsmegligkeit sichergschtellt were solle. So het de radioaktiv Abfall furtgschafft werre miesse un di komplett Vegetation neij opflonzt un ufzoge werre. Später sin Hitte un Hiisser bout worre, dass d Ruckkehrer sofort e Dach iberm Kopf ghet hen.

De Umzug het sich aber numme schwer vollzoge, wil d Amerikaner all meh Mensche un Material vun de Marshallinsle abzoge hen. 1972 het e Iberwachungsteam e erhehti Radioaktivität bi de Frabbe, wu in de Lagun lebe, feschtgschtellt. Drey Johr später sin noch emol gnaueri Messunge durchgfiehrt worre. S Ergebnis vun denne isch gsi, dass s Trinkwasser un d Fricht vun de Insel fir de menschlig Gebruch nit geignet gsi sin. Dodruf hen d Amerikaner mit Wasser- un Nahrungsmittelliferunge ogfonge. Trotz allem hen d Bikinianer aber Endi 1978 s Atoll wider verlosse miesse.

Bikini hit

Om 5. März 2001 isch vum Nuclear Claims Tribunal bschlosse worre, dass d USA on d Bikinianer e Gsomtsumme vun rund 1,1 Mrd. $ zahle mien. In dem Betrag sin de Wertverluscht vum Atoll, e Schmerzensgeld un e Widerufbouhilf din. Eb s Geld aber zahlt wird, isch froglig, wil de Bschluss nit eme Grichtsurteil entschpricht. Sit Johre ruefe d Bikinianer immer wider de Petionsusschuss vum US-Kongress a.

Wenn s Bikini-Atoll aber wider bsidelt werre ka, isch noch uklar. Aber d Insl sin nimmi Sperrgebiet. In de Lagun lige die Schiff, wu bi de Atomteschts gsunke sin: USS Saratoga, USS Carlisle, USS Anderson, USS Lamson, USS Gilliam, USS Arkansas, USS Pilotfish, USS Apogon, HIJMS Nagato un HIJMS Sakawa. Die sin als Ziil fyr Wracktaucher bliebt. De HIJMS Nagato isch s japanisch Flaggschiff bim Agriff uf Pearl Harbor gsi.

Bikini-Badazug

Inschpiriert iber d Schlagzyle vun de Kernwaffeteschts uf em Bikini-Atoll het de Modedesigner un friejere Autoingenieur Louis Réard sin neijes Badekostüm uf de Nome Bikini taift. Am 5. Juli 1946 het s Model Micheline Bernardini de knappe Zweiteiler zum erschte Mol im Pariser Schwimmbad Molitor vorgstellt. Wie dr Réard erwartet ghet het, het de freyzigig Badedress di glich moralisch Entrischtung vorbrocht, wiä d Atombombeversuech uf em Atoll

Weblink

• Homepage vun de Bikinianer (englisch)
• 50 Jahre H-Bombe: Reif für die Insel

Dä Artikel basiert uff ere fräie Übersetzig vum Artikel „Bikini-Atoll“ vu de dütsche Wikipedia. E Liste vu de Autore un Versione isch do z finde.