Binnenmigration

As Binnemigration bezeichnet mä d Migration innerhalb vom ene bestimmte Ruum, meistens innerhalb vom ene Staat. D Binnemigration unterscheidet sich also vo dr transnationale Migration in däm, ass im Allgemeine keini Staatsgränze überschritten wärde. In de Kontext wo d EU beträffe, wird wird aber au bi Migratione vo eim EU-Staat in en andere vo Binnemigration gredet, wil d EU e Ruum ohni Binnegränze isch (Binnemärt, Art. 14 EU-Vertrag) wo d Verfassigs- und Grundrächt vo dr Freizügigkeit für alli Unionsbürgerinne und -bürger garantiert isch (Art. 18 EU-Vertrag, Art. 45 Charta vo de Grundrächt vo dr der EU 2009). Dr Begriff vo dr Binnemigration isch aso nume unscharf definiert, wil d Migration innerhalb von ere chliine Region und au d Wanderig im ene sehr grosse Staat, ere supranationale Organisation oder eme Staateverbund eso cha bezeichnet wärde. Dr Ortswächsel innerhalb vo dr EU isch aso rächtlig-begrifflig kei "Uswanderig ins Usland".

Dr Europäisch Root und die Europäischi Kommission unterstütze Besträbige zur Erliichterig vo dr europäische Binnemigration, bsunders vo dr brueflige Migration. Zu de zentrale Theme ghöre rächtligi Vorussetzige für e verbessereti Mobilität vo de Lüt, wo in dr Bildig, Forschig und Innovation schaffe, die gegesiitigi Anerkennig vo Qualifikatione, d Übertragbarkeit vo Räntenasprüch und Sozialschutzasprüch im Allgemeine und d Iifüehrig vo dr Europäische Chrankeversicherigscharte. Wiiteri Themeberiich si Schuelpartnerschafte und dr Fremdsproochenunderricht an Schuele. D Rächtsprächig vom EUGH het dr Begriff und s Rächt vo dr EU-Binnemigration mit vile Urdeil verdieft, wil d Einzelstaate dr Binne- bzw. Inlandscharakter vo dr EU zum Deil no verweigere, z. B. diskriminiere dütsch Räntestelle, Chrankekasse usw. Räntner u. a., wo in anderi Deil vo dr EU zügle.