Brustwarze

As Brustwarze (au Mamille lat. Mamilla, d. i. Diminutiv vo latiinisch mamma = Brust; die anatomisch korräkti latiinischi Bezeichnig isch Papilla mammaria) wird d Mündig vo de Milchdrüese bezeichnet. D Brustwarze bi de Primate entspricht der Zitze bi alle andere Säugedier.

Anatomii

D Brustdrüese (Mammae) sälber si 15 bis 20 Milchdrüese in der wiiblige Brust, wo mit ihre Milchgänge in der Brustwarze ände. D Drüese si im e Fettgwäb iibettet und produziere noch dr Geburt vom ene Chind d Muetermilch. Si bilde sich in der Pubertät (Thelarche) dur hormonelle Iifluss us em Talgdrüesegwäb und wärde noch de Wächseljohr wider e chli chliiner.

Wil d Brustwarze sich scho in ere sehr früehje Phase bim Embryo im Mueterleib entwiggle, hai si au d Manne. Si hai bi ihne aber, usser ihrer Funktion as individuell deils sehr erogeni Zone, wo bi beide Gschlächter gliich isch, kei wiiteri Funktion. Es wird aber immer wider drvo brichtet, ass in Einzelfäll au Männer zum Stille fähig gsi si. So verzelt dr Alexander vo Humboldt 1799 von eme venezolanische Buur, wo siis Chind noch em Dod vo siiner Frau monatelang gstillt haig. Dur e Hormonzuegob cha d Milchproduktion bim Ma hüte künstlig usglöst wärde. Dr Charles Darwin sälber het in siim Wärk Die Entstehung der Arten spekuliert, dass bi de früehje Säugedier beidi Eltere hai chönne stille. Das het me aber weder chönne bewiise no widerlege.

D Brustwarze isch von eme pigmentierte Warzehof (Areola) umge, wo zahlriichi Talg- und Duftdrüese din ände. Si reagiert sehr stark uf Reizig dur Berüehrig oder Chelti und gültet dorum au as erogeni Zone vo beide Gschlächter. Die starki Reizbarkeit vo der Brustwarze dient allerdings vor allem derzue, ass si dr Säugling bim Stille besser cha finde, wil si sich as Reaktion ufrichtet.

Die wiiblige wie die männlige Brustwarze chömme in de underschiidligste Grössene, Forme und Farbe vor.

Dä Artikel basiert uff ere fräie Übersetzig vum Artikel „Brustwarze“ vu de dütsche Wikipedia. E Liste vu de Autore un Versione isch do z finde.