Burg Alt-Dierschtäi
D Burg Alt-Dierschtäi isch e middelalterlechi Burg im sisgauische Piet vom Jura gsii.
Hüt isch dr Burgplatz i dr aargauische Gmeind Gipf-Oberfrick, und vo dr ehemolige Burg sind nume no Räschte vo dr Ruyne z gseh.
Wil me bi Uusgrabige es baar Sache vo dr Burg gfunde het, weiss me, ass d Burg Dierschtäi scho öpen am Ändi vom zääte Joorhundert bout worden isch, also als eini vo de eerschte sötige Feschtigen im Land. Es isch dr Stammsitz vom bedüütende Adelsgschlächt vo de Dierschtäiner gsi. Wo die im zwölfte Joorhundert uf e nöji Burg im Laufedaal gange sind, het die dr Name «Nöi-Dierschtäi» übercho, und sider heisst die alti Burg im Fricktal ebe die «alti Dierschtäi».
Zum Name vo de Dierschtäiner basst s Bild uf em Wappe; es zeigt uf em guldige Fäld e rooti Hirschchue uf em grüene Drüübärg.
Dr Bouplatz vo dr Burg isch uf dr Südoschtsyte vom Dierschtäibärg, also nid ganz uf em Bärg obe, sondern am Hang bim ene mächtige Felsblock, wo me druff e feschti Burgalag het chönne boue. Mit dr Zyt sind am abheltige Bärghang verschideni Geböid zu dr Chärnburg derzue cho. Wyter nidsi zue lyt no hüt es Landwirtschaftsgebiet mit Fluernäme, wo uf di alti Burg vrwyse: d Burgmatte und d Burghalde.
Nume öpen e halbe Kilometer vo dr alte Dierschtäi ewägg lyt uf eme Bärgsporn bi Wittnau d Ruyne vo dr Burg «Alt-Hombärg».
Die alti Burg isch mit dr Zyt zämegheit und d Schtäine vo de Burgmuure sind gwüss vo de Lüüt i dr Umgäbig für anders brucht worde.
Weblink
ändere- Maria-Letizia Boscardin: Alt-Thierstein. In: Historisches Lexikon vo dr Schwiiz.