Burkhard vo Fenis

Dialäkt: Baseldütsch

Dr Burkhard vo Fenis (au Burkhard vo Haaseburg, * um 1040 z Vinelz am Bielersee; † 12. April 1107 z Baasel) isch e burgundische Aadlige und vo 1072 bis zu sim Dood Bischof vo Baasel gsi. Er isch dr Brueder gsi vom Cuno vo Fenis, wo Bischof vo Lausanne worde isch.

Kindheit und Jugend

Dr Burkhard isch dr Soon vom burgundische Aadelsherr Ulrich vo Fenis gsi und isch an dr Domschuel z Eichstätt zum Gäistlige usbildet worde. Spöötistens um 1069 isch er z Mainz as Kämmerer vom Erzbischof Siegfried I. noochgwiise.

Erläbniss mit em Heinrich IV.

1072 het dr Heinrich IV. vom Gschlächt vo de Salier dr Burkhard zum Bischof vo Baasel erhobe. Er isch 1076 an dr Synode z Worms drbii gsi, wo dr Papst Gregor VII. für abgsetzt erkläärt worde isch. Er het drfür gschafft, ass s Episkopat uf dr Synode vo Piacenza däm wurd zuestimme. Dr König Heinrich isch mit sine loyale Gfolgslüt, under iine au dr Burkhard, mit em Bann gstrooft worde. Im Herrschergebiet vom Heinrich isch druf dr Rudolf vo Schwoobe zum Geegeköönig gweelt worde.

Dr Burkhard het 1077 dr Heinrich begläitet, won er uf Canossa gange isch, dr Babst demüetig aagfleet und bittet het, ass er dr Bann von em wurd nää. Au spööter isch dr Burkhard em König und spöötere Kaiser Heinrich dröi bliibe, und het drfür 1080 d Landgroofschaft Buchsgau mit em Hauptort Härkinge überkhoo. 1084 s Schloss Rappoltstäi im Elsass drzue khoo und 1095 het em dr Heinrich d Abtei Pfäfers im hütigen Kanton Sanggalle gee.

Z Baasel

Dr Burkhard vo Fenis het z Baasel mit em Dalbeklooster s erste Klooster in dr Stadt gründet. Um 1080 het er um Baasel die ersti Stadtmuure baut. Um 1100 het er uf eme Hangvorsprung vom Jolimont d Burg Erlach BE lo baue.

Litratuur

• Romain Jurot: Fenis, Burkhard von. In: Historisches Lexikon vo dr Schwiiz.
• Paul Kläui: Burchard. In: Neue Deutsche Biographie (NDB). Band 3, Duncker & Humblot, Berlin 1957, ISBN 3-428-00184-2, S. 24.
• Georg von Wyß: Burchard, Bischof von Basel. In: Allgemeine Deutsche Biographie (ADB). Band 3, Duncker & Humblot, Leipzig 1876, S. 554 f.

Weblingg

• Burkhard von Hasenburg (von Fenis) uf www.altbasel.ch

Vorgänger Berengar

Bischof vo Basel 1072–1107

Nochfolger Rudolf vo Homburg

Dä Artikel basiert uff ere fräie Übersetzig vum Artikel „Burkhard_von_Fenis“ vu de dütsche Wikipedia. E Liste vu de Autore un Versione isch do z finde.