Claus-Peter Hilger

Dr Claus-Peter Hilger (* 30. Mai 1941 z St. Bläsi; † 12. Februar 2007 au dert) isch e dytsche Schurnalischt un Haimetforscher gsii.

Lääbe

Dr Hilger isch z St. Bläsi ufgwagse. No dr Schuel het er Chaufmann glehrt un ab 1969 as Verlagschaufmann gschafft. Ab 1971 het er as Redaktionslaiter vum Schwarzwälder Bote z St. Bläsi schafft. Anne 2001 isch er in Ruestand gange, het aber au speter no ab un zue fir Zytige gschribe.

Dr Hilger het si langi Johr mit dr Gschicht un Kultur vu syre Haimeregion bscheftigt un dodriber gschribe, in dr Zytig, in Zytschrifte, in Johrbiecher un Antologie. Unter anderem het er gforscht un gschribe zum Chloschter St. Bläsi. Dernäbe het dr Hilger au Gedicht un Prosa uf Alemannisch gschribe. Anne 1976 het er bim Dialäktliteraturwettbewärb aktion junge mundart mitgmacht un isch dert fir sy Gedicht „… nu selle wo’s it höre“ uuszaichnet wore.

Dr Hilger het si au in Verain engaschiert, är isch zem Byschpel Grindigsmitglid vum „Heimatverein Häusern“ un Mitgrinder vum „Geschichtsverein Hochrhein“ gsii. Dernäbe isch er langi Johr Mitglid im Schwarzwaldverain gsii, wun er vu 1977 bis 1987 au Hauptschriftlaiter vu dr Zytschrift „Der Schwarzwald“ gsii isch.

Bolitisch het si dr Claus-Peter Hilger syt 1961 im Ortsverain vu dr SPD engaschiert.

Ab 1975 het dr Hilger z Hüsere gläbt. Är isch ghyrote gsii un het zwai Chinder ghaa. Am 12. Februar 2007 isch er im Alter vu 65 Johr no langer Chranket in eme Chrankehuus z St. Bläsi gstorbe.

Uuszaichnige

• Fürstabt-Gerbert-Prys vu dr Stadt St. Bläsi: 1997
• Haimetmedaille vum Land Bade-Wirttebärg: 2003
• Verdienschtchryz am Band vum Verdienschtorde vu dr Bundesrepublik Dytschland: 2006

Uuasgläseni Wärch

• Heimet. In: Karl Kurrus (Hrsg.): S lebig Wort vu 31 Mundartdichter us em Badische. Alemannische Anthologie. Schauenburg, Lahr/Schwarzw. 1978. S. 89–94
• Claus-Peter Hilger, Stephan Kessler (Hrsg.): Dom St. Blasien auf dem Schwarzwald. Kunstverlag Fink, Lindenberg 2006. 40 S. zahlr. Ill., graph. Darst. (Franzesischi uusgab unter em Titel Basilique Saint-Blaise, Forêt Noire du Sud) . ISBN: 3-89870-218-9.
• Seit 120 Tagen in St. Blasien - der russische Schriftsteller Maxim Gorki. In: Badische Heimat : mein Heimatland. Zeitschrift für Landes- und Volkskunde, Natur-, Umwelt- und Denkmalschutz. Rombach, Freiburg, Br. Bd. 80 (2000), 4, S. 720ff. ISSN 0930-7001
• 75 Jahre Sparkasse in Schluchsee. Bezirkssparkasse St. Blasien 2002
• 100 Jahre Schwarzwaldverein St. Blasien 1885 – 1985. Hrsg. von der Ortsgruppe St. Blasien des Schwarzwaldvereins. Red. Claus-Peter Hilger. 1985. 48 S. Ill.

Weblink

• Susanne Filz: Trauer um Claus-Peter Hilger, Badische Zeitung, 14. Februar 2007
• Cornelia Liebwein: Erinnerung an Heimatforscher, Badische Zeitung, 1. Juli 2013