Diskussion:Phonogrammarchiv der Universität Zürich

Fonogrammarchyv und Wänkersätz

Hoi Ark001! Du schrybsch: «S Inträsse vom Fonogrammarchyv a de Wenker-Sätz isch ofebaar au de Grund defür gsi, ass derno i de Schwiiz e grösseri Akzioon mid dene Sätz gmacht worden isch.» Öb das esoo stimt, glaub i nööd. D Erhebig i de Schwyz staat ämel im Raame vo den Erhebige im ganze tüütsche Spraachruum, glychzytig händ s zum Bypsil au z Ööschterrych stattgfunde, und der Uuftraag für all die Erhebigen isch us Marburg choo. I de Schwyz isch si zwaar ganz starch vom Baachme gförderet woorde, und dëë isch ja scho mit em Fonogrammarchyv verbunde gsy. Aber ebe – de «Grund» lyt chuum bim Fonogrammarchyv sälber. Zum das ales aber gnau chöne säge, muesch s Buech «Geschichte, Anlage und Durchführung der Fragebogen-Erhebungen von Georg Wenkers 40 Sätzen» vom Jürg Fleischer (das Jaar usechoo) läse. Oder schryb doch em Jürg Fleischer es Mail und fröög en über s Verheltnis zwüschet Schwyzer Erhebig und Fonogrammarchyv – ër git gëërn, kompetänt und gschnäll Uuskumpft. En Gruez, --Freiguet (Diskussion) 11:19, 30. Nov. 2017 (MEZ)

Guete Dag, Freigut. Die Information hani us em Bytrag vo dr Nadja Kakhro, won en andere Text vom Jürg Fleischer zitiert. Aber es isch sicher guet, über so Zämehäng chly offener z schrybe bis öper chunt, wo am Artikel wyterschrybt. Danke für din Tipp.--Ark001 (Diskussion) 13:11, 30. Nov. 2017 (MEZ)

Ah, ich han eerscht jetz i dëm Uufsatz gläse, das es scho vil früener en Iniziatyve i Sache Schwyzer Wänkersätz ggëë gha hät und das die würkli vom Fonogrammarchyv uusggangen isch. Das han i nöd gwüsst. D Samlig vo de früene 30er-Jaar aber, wo zu de schriftlich feschtghaltene Schwyzer Wänkersätz gfüert hät, hät aber mit dëren eerschte, bald versandeten Iniziatyve vom Fonogrammarchyv nüüt z tue, si isch vo Marburg uusggange. --Freiguet (Diskussion) 17:41, 30. Nov. 2017 (MEZ)

Hoi Ark001. I ha de Täggscht es bitzeli ergänzt – wän i dyni Mundaart nöd sett troffe haa, tues bisseguet naakorigiere. Im Booklet zu de Schweizer Aufnahmen (deutsch) vo 2002 häts übrigens na rächt vil Imformazioone. En Gruez vom --Freiguet (Diskussion) 17:16, 19. Dez. 2017 (MEZ)

Tialäkt

I welem Tialäkt sell dëë Artikel äigetli gschribe sy? Aso uufgaa tuets nööd… :-) --Freiguet (Diskussion) 18:38, 29. Apr. 2018 (MESZ)