S Dobbelspaltexperimänt

Bim Dobbelspaltexperimänt schickt mä Wälle, zum Bischbil koheränti Liechwälle, dur e Bländi mit zwäi schmale, parallele Spalte, wo d Wällelengi λ chliiner isch as dr Abstand a vo de bäiden Spalte. Uf em Beobachdigsschirm hinder dr Bländi, wo vil witer äwäg isch as dr Abstand a vo de bäide Spalte, zäigt sich en Interferänzmuster. Das Muster entstoot dur d Büügig vo dr Wellenusbräitig am Dobbelspalt. Bi monochromatischem Liecht (z. B. vom ene Leiser) bestoot das Muster uf em Schirm us helle Sträife (Maxima) und dunkle Sträife (Minima).

Wo dr Thomas Young 1802 das Experimänt as Erste gmacht het, isch sis Resultaat as dr Bewiis aagluegt worde, ass s Liecht e Wällennatur het, so wie d Theorii vom Christiaan Huygens es gsäit het, und nid wie dr Newton behauptet het, us Partikel bestoot. Mä cha das Experimänt aber nit nume mit Liecht mache, sondern au mit Däili (Elektrone, Neutrone, Atom, Molekül wie z. B. Fullerene). Au denn beobachtet mä Interferänzmuster, und das isch dr Bewiis, ass au klassischi Däili Wällenäigeschafte häi – mä reedet denn vo Materiewälle und vom Wälle-Däili-Dualismus. Mit em Dobbelspaltexperimänt cha mä dä demonstriere. Bi de „Wele Wääg?“-Experimänt goot s drum, öb s Däili dur dr lingg oder dur dr rächt Spalt gflooge isch (wenn e Däili registriert worde isch), oder öb s Signal von ere Wälle chunnt, wo dur bäidi Spält goot. Dr subtili Widerspruch in sich isch, ass im erste Fall kä Interferänz sött mööglig si, wäärend es im zwäite Fall kä Antwort uf d Froog „Wele Wääg?“ cha gee.

Das Experimänt gältet as s wichdigste Experimänt vo dr Kwantemechanik. Nume in dere Theorii cha s adekwat behandlet wärde.

Litratuur

John Gribbin: Auf der Suche nach Schrödingers Katze. Quantenphysik und Wirklichkeit. 5. Auflage. Piper, 2004, ISBN 3-492-24030-5.
Claus Jönsson: Interferenz von Elektronen am Doppelspalt. In: Zeitschrift für Physik, Nr. 161, 1961, S. 454–474.
David Halliday, Robert Resnick, Jearl Walker: Physik. 2. Auflage. Wiley-VCH, 2003, ISBN 3-527-40366-3.
Wolfgang Demtröder: Experimentalphysik. Bd.2 : Elektrizität und Optik. 3. Auflage. Springer, Berlin, 2004, ISBN 3-540-20210-2.

Weblingg

Commons: S Dobbelspaltexperimänt – Sammlig vo Multimediadateie

Doppelspaltversuch – Einführung mit interaktiven Animationen (Universität Ulm)
Überblicksseite zum Doppelspaltversuch mit Licht (mit Versuchsaufbauten, Simulationen etc.) uf LEIFI
Doppelspaltversuch mit nicht-monochromatischem und monochromatischen Licht im Vergleich (Uni Hannover)

Dä Artikel basiert uff ere fräie Übersetzig vum Artikel „Doppelspaltexperiment“ vu de dütsche Wikipedia. E Liste vu de Autore un Versione isch do z finde.