Else Berkmann

D Else Berkmann (* 31. Merz 1904 z Itzehoe; † 30. Novämber 2001 z Stuegert) isch e dytschi Bolitikeri (SPD), Mitglid vu dr Hamburger Burgerschaft un vum Landdag vu Bade-Wirttebärg gsii.

Lääbe

D Else Berkmann het e chaufmännischi un e huuswirtschaftligi Lehr gmacht. Si isch us ere sozialdemokratische Familie chuu un isch 1923 Mitglid vu dr SPD wore. Im Jänner 1933 isch si in d Hamburger Burgerschaft gwehlt wore, wu im Spotjohr 1933 dur dr Rychsstatthalter Karl Kaufmann ufglest worenn isch. Si un ire Mann Kurt Berkmann (* 1903) hän no dr „Machtergreifung“ illegal fir d SPD gschafft. Si isch churzzytig verhaftet wore, ire Mann isch fimf Wuche in Schutzhaft chuu. Baidi hän dr Arbetsblatz verlore un hän uf Druck vu dr Gestapo vu Hamburg iber Chemnitz uf Dibenga mießen ewäg zie.

Noch em Änd vum Chrieg het si anne 1946 zäme mit em Carlo Schmid un em Fritz Erler zue dr Grinder vu dr SPD z Wirttebärg-Hauezollre ghert. IUber d Barteigränzen ewäg het si d Iniziativ ergriffe fir e „Arbetsgmainschaft vu Dibenger Staatsburgerne“ (Dytsche Staatsburgerne-Verband), go dr Fraue dr Zuegang in d Bolitik lychter mache, un het vu 1957 bis 1972 im Vorstand vu dr Vorgängerorganisazion vu dr bade-wirttebärgische Landeszäntral fir bolitischi Bildig „Der Bürger im Staat“ mitgschafft. Si het as Dozänti un as Mitarbaiteri an Volkshochschuele un au bim Amerikahuus z Stuegert mitgschafft am demokratische Ufbäu.

D Else Berkmann isch vu 1960 bis 1968 fir dr Wahlbezirk Stuegert I diräkt in bade-wirttebärgische Landdag gwehlt wore. Si isch Mitglid im Kulturuusschuss un im Barlemäntsuusschuss gsii, iri Theme sin d Alters- un Bflägehaim, dr Dänkmolschutz, d Erwagsenebildig, di bolitisch Bildig, dr Strofvollzug, di juristisch Uusbildig un s Schuelwäse gsii.

Si isch Mitglid vu dr ÖTV un vum Hauptuusschuss vum Verband vu dr Wirttebärgische Volkshochschuele gsii.

Anne 1975 isch si zur Ehrevorsitzeri vu dr Arbetsgmainschaft vu dr sozialdemokratische Fraue z Bade-Wirttebärg ernännt wore, anderi Ehrige het si, wie s in dr Hansestadt Hamburg gängig isch, uusgschlaa.

Literatur

• Ina Hochreuther: Frauen im Parlament. Südwestdeutsche Parlamentarierinnen von 1919 bis heute, Stuttgart 2012, ISBN 978-3-923476-16-9, S. 143f.
• Frank Raberg: Else Berkmann (1904–2001). In: Momente. Beiträge zur Landeskunde von Baden-Württemberg, Nr. 1/2004, ISSN 1619-1609.

Weblinks

• Nooruef vum Frieder Birzele [1] (PDF; 27 kB)
• Bstand im Archiv vu dr soziale Demokraty adsd

Dä Artikel basiert uff ere fräie Übersetzig vu dere Version vum Artikel „Else_Berkmann“ vu de dütsche Wikipedia. E Liste vu de Autore un Versione isch do z finde.