Erich Hermann

Dialäkt: Schwäbisch

Dr Erich Hermann (* 5. Februar 1911 z Stuegert, wo-nr am 18. Juli 1984 au gschdorba ischt) isch a schwäbischer Volksschauschbiiler, Humorischt ond Sänger gwäa, wo de meischde Leit bloß ondrem Nama Rundfunk-Fritzle kennt hend. Hauptsächlich en de 1950er ond 60er Johr hot’r zo de ganz grauße Nama gheert, wo da schwäbischa Humor weit ibr ihr Hoimet naus bekannt gmacht hend, wia z. B. dr Willy Reichert ond dr Oscar Heiler alias Häberle ond Pfleiderer, dr Werner Veidt, dr Max Strecker ond dr Walter Schultheiß.

S Denkmal fir da Erich Hermann uf-em Stuegerter Killesbergpark

Aus seim Leaba

Dr Erich Hermann kommt am 5. Februar 1911 em Stuegerter Stadtdoil Feierbach uf d Welt. Sei Vadder isch dr Kaufmôô Karl Hermann (1890 bis 1967) ond sei Muadr d Berta Hermann geborene Berger (1890 bis 1967). Scho em Altr vo siiba Johr fangt der Bua ôô, andre Leit ond d Stemma vo vorschiidene Viicher nôchzmachet. Wia der Kerle grad amôl 14 Johr alt ischt, vrliirt’r sein Vadder. Nôch dr Schualzeit dät’r am liabschda an kinschtlerischa Beruaf ergreifa, abr mit sellem Plôô ischt sei Muadr ibrhaupt et eivrstanda. Dui will, dass ihr Soh ebbes Reachts lernt. Drom fangt dr Erich beim Bosch en Feierbach a Lehr zom Werkzeigmacher ôô. Schbätr wechslet’r zom Porsche nôch Zuffahausa.

Em Altr vo 19 Johr wuud dr Erich Hermann Mitgliad beim Dramadischa Vorei Feierbach. Des ischt a Grubbe vo Laiaschauschbiiler, wo leidaschaftlich gern Theäderle schbiilet. En de 1930er Johr lernt’r dui zwoi Johr jengere Paula Häbich kenna, ond bald stellt sich raus, dass sich dia zwoi ganz arg meeget. 1936 fihrt’r des Mädle vôr da Traualtar. Em Lauf dr Zeit brengt se zwoi Dechterla uf d Welt.

Wia bald druf en Eiropa dr Zwoide Weltkriag Angscht ond Schrecka vorbreidet, sodd eigentlich au dr Erich Hermann bei dr Wehrmacht sein Denscht dua, weil’r abr a-ma Magagschwiir leidet, wuud’r dô drvoo vrschont. En seira Freizeit pfleagt’r ganz feschde seine Steckapferd ond ondrhelt an Haufa Leit mit seine Solovorträg. Dô drmit tritt’r au en de Lazaredd uf, om de vorwondate Soldada wiidr Muat ufs Leaba zo macha.

Wia dui scheißlicha Kriagszeit schliaßlich a End gfonda hot, will’r sei Hobby zom Beruaf macha ond nemmt Ondrricht em Schauschbiila ond Senga bei dr Sopranischdin Martha Haas. Seine erschde Uftridd vôr-ama greeßra Publikom begeischdret et bloß d Zuaschauer; au d Presse lobt des jonge Talent. Drom wuud au bald s Radio Stuttgart – a Vorgenger vom Siddeitscha Rondfonk – uf-en ufmerksam. Ab-am Herbscht 1946 däff’r deet zwoi- bis dreimôl en dr Woch mit-ra oigena Sendong ans Mikrofon nôô. En-ra Weihnachtssendong tridd’r zom erschda Môl als Fritzle uf ond sengt sellan jonga Kerle mit Kopfstemm so guad, dass mr moint, a Kend dät senga. Dô driibr send d Heerer so begeischdret, dass bald des Fritzle em Hermann sei feschts Margazoiche wuud. Drom wuudr bald bloß noh s Rundfunk-Fritzle ghoißa.

Zamma mit-em Peter Frankenfeld, em Helmut Zacharias ond dr Lale Andersen gôht’r vo 1950 bis 1953 uf a Tournee durch ganz Deitschland ond begeischdret mit seine schwäbische Sketsch ond Liadr sogar d Leit em hoha Norda. Manchmôl tridd’r mit-ra Partnere uf (hauptsächlich mit dr Rondfonk-Moderatorin Barbara Müller); abr oft vorkerpret’r als Solischt glei mehrere Leit gleichzeidig. Dô drbei wechslet’r blitzschnell sei Stemm vom kloina Bua bis zom alda Graußvaddr. D Liadr, wo am beschda beim Publikom ôkommet, send Dr Killesberg, dr Killesberg, des ischt mei Paradiis ond Ja, bei ons wird gschafft, boide dichdet vom Friedrich E. Vogt ond vrtont vom Hermann Schwander.

Bei deam graußa Erfolg vom Erich Hermann ischs koi Wonder, dass sich au a baar Firmâ en seim Erfolg sonna wellet. So kommt’r zo-ma lukradiva Werbevrtrag mit dr Firma Maggi, wo us-em Rundfunk-Fritzle kurzerhand s Maggi-Fritzle macht. Schbätr kommet noh Werbevrträg fir Storck-Schoklaad, Durodont-Zôhpaschda, Faber-Caschdell-Bleistiftla ond Rachagold-Bombola drzua. Ab 1967 hot’r au reglmäßige Uftridd em Fernseha.

1973 kriagt dr Erich Hermann an Schlagôfall, wo-nr sich nemme ganz drvoo erholt. Des gleiche Missgschick widrfehrt-em 1984 zom zwoida Môl. Abr desmôl kommt jeda Hilf z schbät. Am 18. Juli schliaßt’r seine Auga fir emmr. Sei ledschda Ruha fendet’r um-em Friidhof vo Feierbach.

Ehronga ond Ôôdenka

• Em Johr 1981 hot dr Bundespräsident Karl Carstens em Erich Hermann s Bundesvrdinschtkreiz vorliha. Omghengt hot’s em dr Stuegerter Obrbirgermoischtr Manfred Rommel.
• 1999 hot em Erich Hermann sei Hoimetstadt em Stadtdoil Feierbach ondrhalb vom Killesberg ârâ Strôß sein Nama gäa: da Erich-Hermann-Weg.
• Am 5. Februar 2011, wo dr Erich Hermann 100 Johr alt worra wär, ischt em Stuegerter Hehapark Killesberg uf dr Aussichtspladdform zwischem Hehacafé ond em Killesbergdurm a Gedenkstoi fir-en ufgschdellt worra. Gschdaldet worra isch der Stoi vom Bildhauer Markus Wolf.

Ufnahma

• Rundfunk-Fritzle 1, Erich Hermann – Lieder, Sketche und Witze I (1964, Studioaufnahmen)
• Rundfunk-Fritzle 2, Erich Hermann – Lieder, Sketche und Witze II (1998, Live- und Studioaufnahmen)

Quella

• Gerhard Raff: Ein Feuerbacher wird als „Rundfunk-Fritzle“ berühmt, Stuegerter Zeidong vom 3. Februar 2011 (Ausgab fir da Kreis Beblenga), S. 20
• Lueg d Weblink

Weblink

• D Biografii vom Erich Hermann mit-ma Haufa Bildr