Vercheltig

E Vercheltig und grippale Infekt sin alldaagssproochligi Bezäichnige für en akuti Infekzioonschranket vo de Schliimhüt in dr Naase und de Nääbehöölene, im Hals oder/und in de Bronchie, wo medizinisch nit scharf definiert isch. D Infekzion wird in erster Linie vo Wiire verursacht, mänggisch chömme no Bakterie drzue (Sekundäärinfekzioon, wo mä rä in däm Zämmehang au Superinfekzioon säit).

Die hüfigste Vercheltigswiire ghööre zu de Wiirusgattige vo de Rhino-, Entero-, Corona- und Mastadenowiire und zur Familie vo de Paramyxoviridae. D Vercheltigsinfekt sin die hüfigste Infekzioone vom Mensch überhaupt, Chliichinder si am mäiste betroffe und bechömme s bis zu drizäämol im Joor. Erwaggseni verchelte sich im Durchschnitt öbbe zwäi- bis dreimol im Joor.

Hüfig wird dr grippali Infekt mit dr ächte Gribbe (Influenza) verwäggslet, wo seer vil schwerer isch und wo immunschwachi Persone, z. B. Buschi und alti Mensche chönne dra stärbe.

Wie d Chrankhet ablauft

Mäistens goot e Vercheltig noch ere Inkubazioonszit vo öbbe zwäi bis acht Dääg in öbben ere Wuche harmlos verbii. Vili Lüt si im Joor e baarmol vercheltet, bi Chliichinder gälte vier bis nüün Vercheltige im Joor as normal. Öbber wo infiziert isch, cha je noch dr Art vom Chrankhetserreeger Wiire vo öbbe zwölf Stunde noch dr Infekzioon aa^[1]^[2] und bis dass d Sümptom verschwinde usschäide, bin ere Behandlig mit Steroid (Cortison) au lenger.^[3]

Behandlig

Bin ere Vercheltig bestoot die besti Behandlig, wenn s käini Komplikazioone git, vor allem din, ass mä dr Körper loot lo usrueje in Rüüm wo warm aber nit überhäizt si. Mä sött mäistens sovil drinke, wie mä s Gfüül het, ass mä s bruuchi^[4], aber bim ene Erwaggsige nid weniger as 1,3 – 1,5 Liter^[5] Wasser, Fruchtsäft oder Tee. Eso blibt dr Schliim flüssig und dr Körper dröchnet wägen em Schwitze, dr Absonderig vo Drääne- oder Naaseflüssigkäit nid us. Vor allem bi chliine Chinder muess mä ufbasse, ass si gnueg drinke^[6].