Dr Formonterhoof

47.5636611111117.5842138888889

Dialäkt: Aagglobaseldütsch

Dr Formonterhoof

Dr Formonterhoof isch e historischs Geböid an dr Santihanns-Vorstadt 27 z Baasel und isch e Baasler Kulturguet, wo für d Regioon vo Bedütig isch. Es dient sit 1942 as Gmäindihuus vo dr Christkatholische Kiirche Baasel-Stadt.

Baugschicht

Dr Formonterhof isch 1720 in dr Santihannsvorstadt e chli rhiiuf vo dr Johanniterbrugg für die riichi Witwe vom franzöösische Aadlige Graaf Jean Formont de La Tour baut worde. Das Stadthuus im Stiil vom Barock het as äins vo de chostbarste gulte, wo je in dr Stadt baut worde si. D Witwe isch 1727 gstorbe und vo denn aa het s Huus immer wider emol dr Bsitzer gwäggslet. Öbbe 1747 het dr Groossroot Johann Heinrich Zaeslin Wasser vom ene Brunne am Noodlebärg in si Huus, wo denn no «zem Nöje Huus» ghäisse het, lo läite und es isch wit und bräit äins vo de erste Hüüser gsi, wo fliessends Wasser gha het. Bald druf het s im Samuel de Meriaa ghöört, wo s 1773 für 40‘000 Livres im Johann Georg Streckiise verchauft het. Wääred dr Helvetik het s d Verwaltigschammere für d Generaldiräkzioon vo dr franzöösische Fäldbost rekwiriert und mä het im Streckiise versproche, ass män em s Geböid in guetem Zuestand wurd zrugggee. Dr pröissisch Generalkonsul z Bariis, dr Johann Georg Schickler het dr Formonterhoof gerbt und 1825 im Nicolas Burckhardt-van Robais verchauft.

Si Soon, dr Nicolas Isaac Burckhardt-Zaeslin, het en 1832 vom berüemte Archidekten Melchior Berri im Stiil vom Klassizismus lo umbaue, und no bevor dä fertig gsi isch, isch s Huus in d Händ vom Eduard Meriaa-Koechli cho, wo im zwäite Stock d Decki vom e Saal in Farbe het lo dekoriere, wo an die antiki Römerstadt Pompeji erinneret häi, wo denn grad usgrabt worde isch. Dr Meriaa-Köchli het dr Hoof aber scho 1859 im Bandfabrikant Daniel Meyer-Meriaa witerverchauft, wo dört bis zum Ändi vom 19. Joorhundert gwoont het, und in sinere Zit isch s Grücht ufchoo, ass es im Formonterhoof e Gspängst gääb.. Im Mayer si Nochfolger isch dr Waagefabrikant Charles Heimburger-Volz gsi, won em au d Liegeschafte nääbedraa an dr Spidaalstrooss ghöört häi. 1920 het si Witwe dr Formonterhoof an e Firma verchauft, wo sich mit Cheltimaschine befasst het, und und denn isch er wäred dr Wirtschaftskriise an en Immobiliegsellschaft cho.

Es het denn immer wider Diskussioone gee, öb mä dr Formonterhoof söll abrisse, bis dass am 1. Oktober 1942 es die Christkatholischi Gmäind am für 210’000 Franke kauft het und us em e Kiirchgmäindihuus gmacht het mit Woonige für e Pfarrer und e Sigrist. vo de 1960er Joor aa isch dr Formonterhoof renowiert worde, under anderem mit Hilf vom Aarbetsrabbe und vom Bund. 2009 het d Gmäind d Huusfassade e letscht Mol lo renowiere.

Kwelle

• Ruedi Messerli: Formonterhof
• waymarking: Formonterhof z Basel

Weblingg

• Formonterdybli (pdf)