Francesca Cuzzoni

D Francesca Cuzzoni (* 2. April 1698 z Parma; † 19. Juni 1770 z Bologna) isch en italiänischi Sopranistin gsi.

D Francesca Cuzzoni

D Francesca Cuzzoni mit em Farinelli, im Hindergrund dr Johann Jacob Heidegger. Zäichnig vom Marco Ricci 1729, kopiert vom Joseph Goupy

Lääbe

D Cuzzoni isch e Schüelere vom Francesco Lanzi gsi. Dä het sä gförderet und 1716, wo si achzääni gsi isch, het mä sä z Parma zum erste Mol uf dr Büüni chönne gsee. Zwäi Joor spööter het si z Venedig in dr Rolle vo dr Dalinda in dr Opere Ariodante vom Carlo Francesco Pollarolo debütiert. Denn si chliiner Angaschemant choo, mäistens z Bologna, Parma und Venedig.

Dr Georg Friedrich Händel isch uf d Cuzzoni ufmerksam worde und het sä 1722 für sini Royal Academy of Music z London aagstellt. Dört het si am 12. Januar 1723 as Teofane im Händel sim Ottone debütiert. Die neggste vier Joor si äi lange künstlerische Siigeszug für d Cuzzoni gsi.

1726 het si iire Gsangsleerer, dr Komponist Pier Giuseppe Sandoni ghürootet. Mit iim het si zwäi Chinder ghaa.

Am 6. Juni 1727 isch s zum e Skandaal im King's Theatre z London choo. Bi dr letschte Vorstellig vo dr Opere Astianatte vom Giovanni Battista Bononcini in dere Säsong häi sich d Primadonne Francesca Cuzzoni und Faustina Bordoni uf offniger Büüni Schlötterlig aaghänggt. Über dä Höndel het mä in ganz Öiropa greedet, und vo denn aa het sich d Cuzzoni iiri Angaschmant chönne uuselääse. Si isch u. a. z Bariis, Wien, Venedig, Floränz, Genua, Hamburg Amsterdam, Stuttgart und Bologna ufdrätte. Uf dene Turneä isch iire Lääbensstiil üsserst extravagant und ufwändig gsi. No di no het si sovil Schulde ghaa, ass si zwäimol wäägene ins Gfängnis choo isch. 1748 het sis no äinisch z London brobiert. Das isch aber käi Erfolg worde und si isch no im gliiche Joor uf Bologna zrugg.

Dört isch si zu aarme Daage cho und het in iire letschte Joor iir Lääbe mit Chnöpfmache verdient bis si 1770 gstorbe isch.

Weblingg

 Commons: Francesca Cuzzoni – Sammlig vo Multimediadateie

Fuessnote

Dä Artikel basiert uff ere fräie Übersetzig vum Artikel „Francesca_Cuzzoni“ vu de dütsche Wikipedia. E Liste vu de Autore un Versione isch do z finde.