Französischi Standardsproch

Französischi Standardsproch isch e Usdruck für di standardisierti Form vo de Französische Sproch. 'S handelt sich dodeby um d Gmeinsproch vo de französische Sprochvariatione, wo vo de bildete Französisch-Sprächer vo verschydene Natione benutzt wird. 'S isch au Sproch vo (under anderem) de Wörterbiecher, de Präss, em Fernseh, em Radio usw. Mit dem Namme repräsentiert's e Prestige-Dialäkt.

Definition

Do s Französisch e plurizäntrischi Sproch isch, hät's im Standard-Französisch mehreri Standardvarietäte. D Syntax, d Morphology und d Orthografy vom Französische sin in vyle Grammatikwerch agsproche worre, zum Bispyl in sällem vo de Brieder Bescherelle (Frankrych) oder vom Maurice Grevisse (Belgie).

Frankrych

Z Frankrych isch s Standardfranzösisch uss de Ussproch und em Vokabular hergleitet, wo im französische Müeterland verwändet wird. Zwar wird's vo de Pariser Ussproch dominiert, allerdings bedient mer sich dört au vo andere Register.

Kanada

In de Provinz Québec wird s Standardfranzösisch oft mit em Français international verwechselt, wyl in de Kultur- und Nochrichtesändige bis in d 1970er-Johr e anderi Ussproch verwändet worre isch. Usserhalb vom französischsprochige Kanada sait mer "Standard" zu de Sproch vo de Dokumänt und de Rede vo de kanadische Regierig. Hützdag wird d Forschig zu dem Thema meh uff di informälle Underschyd vom Québec-Französisch und vom Akadische Französisch usgrichtet. Wyl di kanadische Französischsprächer Werch vo französische und belgische Autore genauso hüfig als Referänz nämme wie sonigi vo Linguiste uss Kanada, blibt e Fazit zum Thema Standardsproch z Kanada bis hütt us.

Gschicht

Obwohl sit de Festlegig vom Standardfranzösisch scho Johrhunderte vergange sin, isch sich d Allgemeinheit einig, dass für d Standardsproch numme d Entscheidige vo de Académie française und em Office québécois de la lange française vo Bedütig sin. 'S git au e Hegemony, wo denoch Frankrych traditionällerwis und als Wirkig vom Imperialismus im Vordeil isch. Trotz vyle regionale Abwychige isch s Standardfranzösisch vom Müeterland oft e Modäll für Främdsprochler, wyl si Angscht vor Missverständnis hän.

Lüeg au

Dä Artikel basiert uff ere fräie Übersetzig vum Artikel „Français_standard“ vu de franzeesische Wikipedia. E Liste vu de Autore un Versione isch do z finde.