Gleitschirmflüüge

Als Gleitschirmflüüge (in andere Dialekt au Gleitschirmfliëge oder Gleitschirmfleige gnennt) bezeichnet me z' ummeflüüge i de Luft mit eme Gleitschirm.

Aafäng

Di Erschte Ideeä het der NASA-Ingenieur Francis Rogallo bereits 1948 imene Patänt feschtghalte. Konkret worde isch es aber erscht, wo de David Barish de Sailwing erfunde het. Leider hät niemer siini Sportart Slope Soaring mache welle - so isch es halt wider vergässe g'ange.

So richtig los gange isches denn erscht, wo de Dan Poynter 1974 beschribe het, dass me miteme Fallschirm chönnti vomene Bärg starte. Die Flüüg sind aber meh kontrollierte Abschturz als würklichs Flüüge gsi und so sind denn vor allem Bärgstiiger uf dä Sport cho, wo nid händ welle wider abelaufe.

Ab ca. 1980 sind denn au Gleitschirm uff em Markt gsi, wo dä Name au würkli verdient händ: me hät si nümme chönne im freie Fall öffne - däfüür sinds viill besser gsi im Flüüge. Diä händ denn e Gleitwinkel vo öppe 1:3 kha.

Uusrüschtig

Z'allererscht khört da natürli de Gleitschirm dezue. Denn bruucht me es Gurtzüüg, en Notschirm und aaschtändigi Chleider. Das sind hochi Schue, Winddichti Chleider und en Helm!

Flüüge

Rückwärtsstart in Fiesch

Starte tuet me vo Bärge oder mit emene Windeschlepp. Da deffür gits zwei Technike: De Vorwärtsstart und de Rückwärtsstart.

Zum Schtüüre het de Gleitschirm zwei Bremsleine, mit dene me d'Richtig und s Tempo beiiflusse chan. Zum Schneller flüüge git's au no de Beschleuniger, wo em Schirm (mit grösserem Sinke!) no grösser's Tempo verschafft.

Mit Hilf vo Thermik und dynamische Wind cha me au Höchi gwünne. Die chamme denn iisetze zum de nächschti Uufwind (au Schluuch gnennt) z' sueche. Mit dere Technik chamme denn au grösseri Distanze zurugglegge. De Wältrekord isch bi 423 km - de Europarekord bi 323 km!

Lehre

Abhebä in d' Natur!

Z' lehre isch für öpper normal begabt's nid schwirig: Bi 'nere seriöse Flugschuel chamme dä Schport innerhalb vo öppe enem halbe Jahr lehre. Nach enere theoretische und enere praktische Prüefig chamme denn au allei und ohni Uufsicht vomene Fluglehrer umeflüüge.

Faszination

Mängi Pilote redet bi dem Sport vomene regelrächte 'Suchtpotential', so gross isch die Faszination. Es isch denn au die eifachschti Art, zum in d' Luft z'cho. Das giltet sowohl für en Einzelflüüger wie au für en Tandemfluug (oder au Biplace g'nennt).

Me chan au mit relativ wenig Uufwand wunderschöni Schtunde i de Bärge verbringe will sogar unsportliche Lüüt chönd dä Rucksack a de Startplatz trääge.

Komischerwiis mues me nid Schwindelfrei sii, zum dä Sport z' mache. Das chann da demit zämehänge, dass bim flüüge d' Landschaft esoo wiit ewäg isch, dass si scho wider abstrakt erschiint.

Weblink

Commons: Paragliding – Sammlig vo Multimediadateie