Helmut Heizmann

Dr Helmut Heizmann (* 1946 z Offeburg) isch e dytsche Molermaischter un Dialäktautor.

Lääbe

Dr Heizmann het no dr Schuel Moler gleert un dr Maischter gmacht. Vu 1972 bis 1987 het er im aigene Bedriib gschafft. Bis im Merz 2001 het er an dr Fachhochschuel Offeburg gschafft un isch im April in vorzogene Ruestand gange.

Syt dr 1970er Johr isch er aktiv bi dr „Althistorischen Narrenzunft Offenburg e.V.“, unter anderem uf dr Bihni un as Schryber vu Stuck. Är het im Lauf vu dr Johr e Hufe Artikel fir Zytige un Bydreg in Zytschrifte gschribe. Är schrybt au Gedicht un Gschichte uf Alemannisch, e Uuswahl het er anne 1997 unter em Titel „do kannsch mol sähne …“ vereffetligt.

Är isch Mitglid vu dr Muettersproch-Gsellschaft. Vu 2002 bis 2011 isch er au Mitglid im Vorstand gsii un vu 2002 bis 2012 Vorsitzer vu dr Regionalgruppe Offeburg.

Derzue singt er in eme Mannechor, spiilt Alphorn in verschidene Formatione un isch Mitglid im Chinschterlverain ARTist Gengenbach e. V.

Dr Heizmann wohnt z Gängebach. Är isch gyhrote un het fimf Chinder, drei Dechtere un zwee Sihn.

Wärch

• do kannsch mol sähne... Selbstverlag, Offenburg 1997

Weblink

• dr Helmut Heizmann uf dr Websyte vu dr Muettersproch-Gsellschaft