Hieron II. vo Syrakus

De Hieron II. (au Hiero II.; * um 306 v. Chr.; † Aafang 215 v. Chr.) isch Köönig vo Syrakus vo 269 bis 215 v. d. Z. gsi und het im Erste und in dr Aafangsfaase vom Zwäite Punische Chrieg e wichdigi Rolle gspiilt, zerst as Gegner und denn as Verbündete vo de Römer.

e Münze mit em Hieron em II. vo Syrakus druffe

Biografii

Dr Hieron isch dr uneheligi Soon vom Hierokles, eme Syrakuser Aadlige, gsi und het behauptet, ass er vom Gelon wurd abstamme. Wo dr Pyrrhos vo Epirus Sizilie im Joor 275 v. d. Z. verloo het, het d Armee und d Bevölkerig vo Syrakus dr Hieron zu iirem Milidäärkommandöör (strategos autokrator) ernennt. Er het si Posizioon gsterkt, won er d Dochder vom Leptines, em wichdigste Bürger vo dr Stadt, ghürootet het.

Zur gliiche Zit häi d Mamertiner, e Grubbe vo kampanische Söldner, wo dr Agathokles aagworbe het, d Festig vo Messana bsetzt und vo dürt us d Syrakuser in Angst und Schrecke versetzt. Schliesslig het si dr Hieron in ere Schlacht bi Mylae gschlaage. Er het aber Messana nid chönne bsetze, wil Karthago drgeege gsi isch. 269 v. d. Z. isch dr Hieron zum Köönig usgrüeft worde.

Im Joor 264 v. d. Z. het dr Hieron d Mamertiner aagriffe und die häi die Römischi Republik um Hilf bittet. Dr Hieron het sich denn em punische Fäldheer Hanno aagschlosse, wo grad in Sizilie glandet gsi isch. Dr Konsul Appius Claudius Caudex het en gschlaage und er het sich wider uf Syrakus zruggzooge. 263 v. d. Z. het er e Verdraag mit Rom müesse abschliesse, won em as Herrschaftsgebiet dr Südoste vo Sizilie und d Ostküste bis uufe uf Tauromenium (Taormina) gloo het.

Vo denn bis zu sim Dood im Joor 215 v. d. Z. isch er de Römer gegenüber loyal bliibe und het si vo Zit zu Zit in de Punische Chrieg mit Maane und Verpfläägig understützt. Er het e mächdigi Flotte zur Verdäidigung ufbaut und het im Archimedes dr Ufdraag gee, sälli Maschine z baue, wo spööter wääred dr Belaagerig vo Syrakus dur d Römer e wichdigi Rolle gspiilt häi.

Dr Theokrit, wo im Hieron si bevorzugt Dichder gsi isch, het im 16. Idyll dr syrakusisch Woolstand under em Hieron beschriibe.

Usserdäm isch dr Hieron II. für si Palastschiff Syracusa bekannt, wo äins vo de grösste Schiff in dr Antike gsi isch. Es sig für alli Hääfe im Middelmeer vil z grooss gsi, usser für e Haafe vo Alexandria. Dr Hieron het s spööter em Köönig Ptolemaios III. vo Egüpte gschänggt.

Kwelle

• Diodor 22,24–26,24
• Justin 23,4
• Livius 21,49–51; 22,37; 23,21
• Polybios 1,8–6,7
• Johannes Zonaras 8,9

Litratuur

• Caroline Lehmler: Syrakus unter Agathokles und Hieron II. Die Verbindung von Kultur und Macht in einer hellenistischen Metropole. Verlag Antike, Frankfurt/M. 2005, ISBN 3-938032-07-3.

Fuessnoote

Dä Artikel basiert uff ere fräie Übersetzig vum Artikel „Hieron_II._von_Syrakus“ vu de dütsche Wikipedia. E Liste vu de Autore un Versione isch do z finde.