Hirzel
D Hirzel sind e Familie – oder vilecht gnöier: e Gruppe vo Familene, wo sit em 14. Jaarhundert i de Stadt Züri und im Züri Oberland läbed.
Ane 1318 isch im ene Buech vom Fraumöischter de Naame ufgschribe. 1540 hät me de Peter Hirzel vo Pfäfiken is Zürcher Bürgerrächt uufgnaa. De Salemaa Hirzel (1580–1652) isch 1637 de Bürgermäischter vo Züri woorde. Und im alte Züri sind wyters na vil Lüüt us däm Gschlächt a die stedtischen Ämter cho, vierzg vonne sind im chlyne Raat, de damalige Regierig, gsy. Wider anderi sind Theolooge woorde.
Vo de Stadtzürcher Hirzel stamed Familiezweig in es paar anderne Länder ab.
I de Zyt vom Züriputsch ane 1839 isch de Conrad Melchior Hirzel Bürgermäischter z Züri gsy, wärend de Bernhard Hirzel d Lüüt us em Oberland agfüert hät, wo uf Züri los sind.