Dr Horst Junker (* 23. Oktober 1925 z Offeburg; † 26. Oktober 2019 ebe dert) isch e dytsche Unternämer un Kommunalbolitiker gsii.

Lääbe ändere

Dr Junker isch z Offeburg uf d Wält chuu, aber z Annaberg im Erzgebirg daift wore, wu sy Mueter här gsii isch. Är isch z Offeburg in dr Oschtstadt mit drei Gschwischtrig ufgwagse, ere Schweschter, Renate, un zwee Brieder, Heinz un Rudi. Sy Vater isch e Zimmermann gsii, wu si anne 1930 sälbschtändig gmacht ghaa het.

Anne 1939 isch d Familie in d Stroßburger Stroß umzoge in d Neechi vu dr Zimmerei vum Vater. No dr Schuel het dr Junker Zimmermann glehrt, är het solle s Gschäft vu dr Eltere ibernee. No zwaiehalb Johr Lehr het er d Gsellebriefig vorzytig abglait, wel er in Rychsarbetsdienscht yygruefe woren isch. Derno isch er zum Militär yygruefe wore, zerscht zue dr Yysebahnpionier z Stroßburi, derno uf Stuegert un anderi Stedt, wu si Brucke repariert hän, schließli an d Front z Rumänie un z Ungarn. Wun er an sym 19. Geburtsdag in eme Hyyserkampf gstäckt isch, heb er dänkt, des sei sy letsche Geburtsdag. Am 9. Mai 1945 isch er in amerikanischi Chriegsgfangeschaft chuu un isch am 21. Juli entloo wore. Wider in dr Haimet het er im Bedriib vum Vater ghulfe, d Firma het argi Schäde ghaa dur Bumbardierige. Ab 1949 hän si wider chenne in dr Wäärchstatt schaffe. Im nämlige Johr het dr Junker z Charlsrue am Staatstächnikum aafange studiere. Wu sy Vater ihn fir e Großufdrag dehaim bruucht het, het er s Studium aber wider abbroche un het dehaim wyter gschafft. Anne 1951 het er derno dr Maischter gmacht.

In dr 1950er Johr het dr Junker im Bedrib vum Vater allmee Verantwortig ibernuu. Si hän Großufdreg unter anderem fir d Stadt un di franzesisch Armee, wu do stationiert gsii isch, ghaa. Au sy jingere Brueder Rudi het im Bedrib migschafft. Anne 1960 het dr Horst Junker dr Bedrib in dr Helmholtzstroß vum Vater ibernuu. Im Lauf vu dr Johr het er d Zimmerei no ergänzt mit ere Schrynerei un ere Glaserei un het s zue me mittelständische Unternäme uuseböue. Au d Entwicklig vu dr Offeburger Herbschtmäss zur Oberrhymäss het dr Junker mitbregt, aafangs as Handwärcher un schließli 23 Johr lang as Mitglid vum Ufsichtsrot vu dr Mäss.

Vu Oktober 1971 bis Septämber 1994 un nomol vu Mai 1996 bis Dezämber 1999 isch dr Junker fir d CDU Mitglid vum Offeburger Gmairot gsii.

Am 11. Novämber 1955 isch dr Junker Mitgid vu dr Althistorische Naarezumft Offeburg wore. Vu 1960 bis 1980 isch dr Junker Zumftmaischter gsii, speter isch er Ehrezumftmaischter wore. In syre Zyt as Zumftmaischter het er si fir dr Böu vum „Narrekeller“ engaschiert. Zum 150. Jubliäum vu dr Naarezumft anne 1994 het er e Chronik vu dr Zumft unter em Titel „Schelle, Schelle Sechser“ im Schwarzwald Verlag publiziert. Scho anne 1987 het er e Sammlig mit Gschichtli un Anekdote uf Alemannisch unter em Titel „G`schriewe isch bliewe“ uusegee. Derzue isch er Mitglid im Hohe-Horn-Kreis rund um dr Hubert Burda un e begaischterete Jeeger gsii.

Fir sy Engaschmänt het dr Junker anne 1991 s Bundesverdienschtchryz iberchuu.

Anne 1951 het dr Horst Junker sy langjehrigi Liebi Ilse ghyrote, wun er scho vum Danze in syre Juged här gchännt ghaa het. Si hän zäme zwoo Deechtere ghaa, Gabi un Ulrike. Fir sy Familie het er anne 1990 e Huus z Offeburg-Biel böue, im nämlige Johr het er e Schlag kriegt un het druf derwäge s Gschäft verchauft. Au ne Biografy vu sym aigene Lääbe het er fir sy Familie verfasst in ere Uflag vu zeh Exemplar.

Drei Däg no sym 94. Geburtsdag het dr Horst Junker am 26. Oktober 2019 im Krais vu syre Familie d Auge fir immer zuegmacht.

Schrifte ändere

  • Schelle - Schelle Sechser. Offenburger Narrenchronik. Die Geschichte der Althistorischen Narrenzunft Offenburg. Hrsg. Von der Althistorischen Narrenzunft Offenburg e. V. Reiff Schwarzwaldverlag, Offenburg 1994. ISBN 978-3-922663-23-2. 239 S.
  • G`schriewe isch bliewe. Erlebtes und Erzähltes bei diversen Anlässen mundartlich vorgetragen. Eigenverlag, Offenburg 1987. 96 S.
  • Dr „alt Offeburger“ un si Veef. In: Alemannisch dunkt üs guet III/IV 2006. S. 8-10

Weblink ändere