Hot Five
Louis Armstrong and his Hot Five isch e Hot Dschääs Studio-Bänd z Chicago in de Joor 1925 bis 1928 gsi. Si het 65 Ufnaame gmacht. D Bänd isch öffentlig nume zwäimol ufdräte, am 27. Februar 1926 und am 12. Juni 1926 – bäidi Mol im Coliseum Theatre z Chicago.[1]
Bedütig
ändereDas isch die ersti Bänd gsi, wo Dschääsufnaame gmacht het, wo d Soliste din mee Ruum überchoo häi, zum improwisiere, und wo dr Dschääs zun ere Kunstform erhoobe het, wie mä s hüte kennt. Dr Kritiker Gary Giddins dänggt, ass es sich um „s iiflussriichste Ufnaame-Brojekt vom Dschääs handlet, villicht sogar vo dr ganze amerikanische Muusig“.[2]
D Mitgliider vo dere erste Hot Five si dr Louis Armstrong gsi, zerst am Kornett und gläägentlig au as Sänger, vo 1927 aa an dr Dschääsdrumbeete, mit sinere zwäite Frau Lil Hardin Armstrong am Klavier, em Johnny Dodds an dr Klarinette und am Altsaxofoon[3] und em Kid Ory an dr Posuune[4] und em Johnny St. Cyr am Banjo. 1926 isch mänggisch d Sängere May Alix drbii gsi, im Septämber und Dezämber 1927 dr legendäri Dschääs- und Blues-Gitarrist Lonnie Johnson.
Im Mai 1927 isch die Bsetzig vo de „Hot Five“[5] zämme mit em Pete Briggs an dr Tuba und em Baby Dodds am Schlaagzüüg as Louis Armstrong and his Hot Seven ufgnoo worde.
1928 isch d Bänd näi bsetzt worde. D Hot Five si e Sextett worde mit em Louis Armstrong as Sänger und an dr Dschääsdrumbeete, dr Jimmy Strong an dr Klarinette und am Tenorsaxofoon, em Fred Robinson an dr Posuune, em Mancy Carr am Bändscho, em Zutty Singleton am Schlagzüüg und em Earl Hines am Klavier und as Sänger. Vom Dezämber 1928 aa isch si zum Septett worde, wo dr Don Redman an dr Klarinette und am Altsaxofoon drzuechoo isch. Im Dezämber 1928 häi s dr Naame zu Louis Armstrong and his Savoy Ballroom Five gänderet. Dr Armstrong het im Merz 1929 no mee Umbsetzige gmacht, und eso isch s Louis Armstrong and His Orchestra uf d Wält choo.
Litratuur
ändere- Michael J. Budds und Gene H. Anderson The Original Hot Five Recordings of Louis Armstrong (Cms Sourcebooks in American Music) Pendragon Press 2007, ISBN 978-1576471203
- Brian Harker Louis Armstrong's Hot Five and Hot Seven Recordings (Oxford Studies in Recorded Jazz) Oxford University Press 2011, ISBN 978-0195388411
Fuessnoote
ändere- ↑ Michael J. Budds/Gene H. Anderson The Original Hot Five Recordings of Louis Armstrong, S. 79-80, 82
- ↑ G. Giddins Visions of Jazz: The First Century, S. 93
- ↑ Mit deene Musiker het dr Armstrong scho vorhäär im King Oliver sinere Creole Jazz Band zämmegschafft.
- ↑ Bim äim Ufnaamtermin, am 27. Novämber 1926, isch dr Ory dur e Hy Clark ersetzt worde.
- ↑ am 7. Mai het dr Posuunist John Thomas anstatt vom Kid Ory gspiilt