Idir

Dr Idir (* 25. Oktower 1949 z Ait Yenni ìn Algerià; † 2. Mai 2020 z Pàris) ìsch a àlgerischer Sìnger un Komponischt gsìì. Ar hàt ìn dr Kàbylischa Sproch gsunga, dr Berbersproch vu Nord-Àlgerià.

Idir (2011)

Dialäkt: Mìlhüüserisch

Jugend

Idir ìsch si Nàmma àls Kìnschtler gsìì, si rìchtiger Nàmma ìsch Hamid Cheriet gsìì. Ar ìsch dr Suhn vu'ma Schafer gsìì. Ar ìsch ìn'ma Dorf ìn da Djurdjura Barga ufgwàchsa, ìn'ra Fàmìlia wo d Berberischa Kültür sehr làwandig gsìì ìsch.

Ìn dr Schüel hàt dr Idir Geologii glehrt. Ànna 1973 ìsch'r plätzlig àls Sìnger bekànnt worra, wo-n'r uf Radio Alger s Liad „A Vava Inouva“ (Mi Pàppa) gsunga hàt. 's ìsch a Schlofliadla fer d Kìnder gsìì, komponiart noh'ma Text vum Dìchter Ben Mohamed.

Kàrriar

Ànna 1975, noh sim Militärdianscht, ìsch'r uf Pàris gànga fer a Album bim Musikverlàger Pathé Marconi z produziara. Sina Liad „A Vava Inouva“ ìsch nohdam a ìnternàtionàler Erfolg worra.

Ìn sinera Kàrriar hàt'r gliichzittig sina tràditionnella Kültür un Sproch unterstìtzt, àwer aui d Frìndschàft mìt àndera Lander un Kültür entwìckelt.

Si Album „Identités“ ìsch, ànna 1999, ìn Pàrtnerschàft mìt beriahmta Kìnschtler erstellt worra. Bi dana sìn zum Beispiil dr Manu Chao, dr Dan Ar Braz, dr Maxime Le Forestier un dr Gilles Servat gsìì, un aui d Müsikgrupp Gnawa Diffusion, Zebda un Orchestre national de Barbès. 's ìsch aui a großer Erfolg worra.

Ar ìsch àm 2. Mai 2020 ìm Spitàl z Pàris gstorwa.

Album

• 1976: A Vava Inouva (Oasis, Algerià / Pathé, Frànkrìch)
• 1979: Ay arrac nneɣ (Azwaw)
• 1980: Récital à l'Olympia (Azwaw)
• 1991: A Vava Inouva (Blue Silver)
• 1993: Les Chasseurs de lumière (Blue Silver)
• 1999: Identités (Sony Music)
• 2002: Deux rives, un rêve (Sony Music)
• 2005: Entre scènes et terre (Sony-BMG)
• 2007: La France des couleurs (Sony-BMG)
• 2013: Adrar inu ( Columbia)
• 2017: Ici et ailleurs (Sony Music, Frànkrìch / Izem Pro, Algerià)

Externa Links

 Commons: Idir – Sammlig vo Multimediadateie