Wärkdaate
Originalditel: Irische Legende
Originalsprooch: deitsch
Muusig: Werner Egk
Libretto: Werner Egk
Literarischi Vorlaag: Versdrama Countess Cathleen vom William Butler Yeats
Uruffüerig: 14. Auguscht 1955
Ort vo dr Uruffüerig: Salzburg
Lengi vo dr Opere: Zwoi Stond
Ort und Zit vo dr Handlig: Irland zo-ra legendära Zeit
Persoone
  • d Cathleen (Sopran)
  • dr Aleel, a Dichder (Bariton)
  • dr Tiger (Bariton)
  • dr Geier (Tenor)
  • zwoi Eila (Sopran ond Alt)
  • zwoi Kaufleit (Tenor ond Bariton)
  • zwoi Hirda (Tenor ond Bass)
  • dr Fauscht als Erscheinong en seira Vordammnis (Bass)
  • a Stemm hendr dr Szene (Bass)
  • d Oona, a Amme (Alt)
  • dr Vorwaldr (Bariton)
  • a graußa Grubbe vo Engel (a gmischder Chor)
  • de leere Seela (a Solo-Sopran ond a Frauachor)
  • a Schlang (dui Figur därf bloß danza)
Dialäkt: Schwäbisch

Irische Legende ischt a Opr en fenf Bilder vom Kombonischda Werner Egk, wo us-em boirischa Schwôbalendle stammt. Der Môô hôt au s Libreddo vorfasst. Des fuaßt uff-em Versdrama Countess Cathleen vom irischa Dichter William Butler Yeats. Zom erschda Môl uff d Bihne komma isch des Werk am 14. Auguscht 1955 z Salzburg bei de dortige Feschtschbiil. A Uffihrong dauret rond zwoi Stonda.

Firs Orkeschtr braucht-ma ändere

Zwoi Fleeda, gleichviil Oboa, Klarinedda ond Fagodd, viir Herner, zwoi Drombeeda, drei Posauna, a Basstuba, a Harf, a Klaviir, a grauß Schlagwerk ond a graußa Streicher-Grubbe

Handlong ändere

Ort ond Zeit ändere

Dui Opr schbiilt en Irland zo-ra legendära Zeit.

S erschde Bild: Em Wald vo de Dämona ändere

Dia Dämona, wo en deam Werk a graußa Roll schbiilet, werret vo lauder wilde Viicher vorkerpret. Dr Tiger isch dr Ôfihrer vo-nen. Der hält a Red zo seine Ondrgeabene: D Menscha hedded ihr freia Wahl et richdich gnutzt; viilmeh wäret se bloß ihre oigene Triib ond Launa gfolgt. Drom miaßet-se fir ihr Vorhalda gschdrôôft werra. Durch Honger ond Angscht sollet-se firs Reich vo de Dämona eigfanga werra. Dui Ôschbrôôch ischt au vo de Engel gheert wôrra. De selle entgegnet de Dämona, dass-se scho drfir sorga wellet, dass dia Beese et älle Seela krieget.

S zwoide Bild: En dr Cathleen ihrem Haus ändere

D Cathleen ischt a jongs Mädle, drzua noh schee ond reich. Grad hôt-se Bsuach vo ihrem Freind, em Dichder Aleed. Der vorzehlt-ra vom kommenda Oheil. Bald druff bestädiget zwoi vo dr Cathleen ihre Hirda, dass em ganza Land s Viih uff a furchtbara Art z Grond gôht. Abr dô drmit et gnuag: Dr Vorwalder berichdet, dass au s Getreide heeganga ischt.

Dr Aleel empfiihlt seira Freindin, d Flucht zo ergreifa. Aber so ebbes helt d Cathleen fir a Feigheit; drom bleibt-se liaber, wo se ischt. Se lôôt ihr Haus ond ihre Schuira fir de notleidende Leit effna. Gleichzeidich schickt-se an Dinschtbooda ens Nôchbrland, om deet a nuis Viih ond a brauchbars Korn zo kaufa. Zom zwoida Môl wuud d Cathleen vo ihrem Freind uffgfordret, des vordammde Land zo vorlassa. Wia abr nô d Cathleen emmer noh standhaft bleibt, schweert dr Aleel, dass er jetzt au bei-ra bleiba dät.

S dridde Bild: Wieder em Wald vo de Dämona ändere

Dia furchtbare Dämona bejublet ihrn Erfolg. Se freiet sich ibr dui Angscht ond dean Honger, wo-se vorbreidet hend. Scho fanget d Leit ôô, ihre Seela an des Lombapack zo vorkaufa. Alloi d Cathleen bleibt standhaft bei ihre Grondsätz. Fir sui geit’s halt oin Grond, wo-se erschiddra kennt: wenn se vo ihrem Freind Aleel im Stich glassa werra dät. Des wisset au dia Dämona. Drom schicket-se deam Menscha firchderliche Traim ond lent-em au da Goischt vom Fauscht erscheina, also vo sellem Kerle, wo en dr ewiga Vordammnis leabt.

S virde Bild: Wiider em Haus vo dr Cathleen ändere

Des beese Gsendl vorsammlet sich mit älle „leere” Seela en dr Cathleen ihrem Haus ond stehlet dera ihre vorbliibene wertvolle Sacha. Zwoi Kaufleit en dr Gschdalt vo Hyäna berichdet deam Mädle, dass älle ihre ausgsandte Leit, wo da Auftrag ghet hend, nuie Herda zo kaufa, z dodgschlaga wôrra send ond ihr ganz Geld graubt wôrra ischt. Wia nô au noh dr Aleel drherkommt, grischdet fir a langa Reis, ond sich ganz hälenga drvoostihlt, nô hält’s d Cathleen nemme aus; se wirkt uff oimôl wia a Heifle Elend ond bricht zamma.

S fuffde Bild: Ama Kreizweag ändere

Ondr de Dämona herrscht a graußa Uffregong; se feilschet om d Seela vo de vorengschdichde Leit. Au d Cathleen daucht auf. Uff dera ihr Seel hend’s dia Dämona jô ganz bsonders abgseha. Des Mädle erklärt sich jetzt bereit, ihr Seel zo vorkaufa, abr bloß om da Preis, dass älle Seela, wo sich scho em Besitz vo sellem Hellagsendl befendet, erleest werret ond em Land wiidr Heiderkeit ond Frehlichkeit eiziagt. Zor Iberraschong vo dr Cathleen erkläret sich dia Dämona mit deam Handl eiverschdanda.

Uff oimôl erscheinet a baar ganz donkle Booda, wo da Ufftrag hend, d Cathleen en de ewich Vordammnis zo fihra. Dô drmit hend-se abr koi Glick: Ibr deane Gsella fangt a Licht zom Leichda ôô, wo emmer heller wuud. Kurz druff erscheint a Grubbe vo Engl. De selle fihret d Cathleen zom Licht. Dia Dämona hend ihrn Kampf vorlaura. Dui Opr heert dô drmit uff, dass dr Aleel fir d Cathleen da Gsang vo dr Unsterblichkeit sengt.

Litradur ond Quella ändere

  • Hellmuth Steger / Karl Howe: Opernführer, Fischer Bücherei KG Frankfurt am Main, 8. Ufflag vo 1961
  • Lueg d Weblink

Weblink ändere