Isabella I. vo Kastilie

D Isabella I. vo Kastilie (schbanisch Isabel I de Castilla; * 22. April 1451 z Madrigal de las Altas Torres; † 26. Novämber 1504 z Medina del Campo; au Isabella die Katholisch, span. Isabel la Católica) isch vo 1474 bis zu iirem Dood 1504 d Köönigin vo Kastilie und León und vo 1479 bis 1504 as d Frau vom Ferdinand II. au d Köönigin vo Aragón.

Regierigszit

D Isabella het zämme mit iirem Maa Ferdinand über e groosse Däil vo dr Iberische Halbinsle gherscht. Si het sich scho 1486 für e Christoph Kolumbus iigsetzt, so dass er denn 1492 Amerika under dr spanisch-kastilische Faane het chönne entdegge. Das isch d Grundlaag für s spöötere spanische Kolonialriich gsi.

Under iire isch 1488 dr Consejo de la Suprema y General Inquisición, die spanischi Inkwisizioon iigfüert worde, wo vor allem die sogenannte Marranos undersuecht het, zum uusefinde, öb si im Ghäime immer no Juude sige. Vili von ene si im e Autodafé uf em Schiterhufe verbrennt worde.

Churz noch em Ändi vo dr Reconquista, dr Erooberig vom Emiraat vo Granaada, wo dr letscht Stützpunkt vo de Maure in al-Andalus gsi isch, im Januar 1492 het si am 31. Merz 1492 s Alhambra-Edikt underschriibe, wo alli spanische Juude us em Land usgwiise het. 1502 si au die letschte Muslim us Spanie verdriibe worde.

D Isabella und dr Ferdinand häi im ganze Land d Santa Hermandad (die Häiligi Bruederschaft) iigfüert, e Bolizei- und Justizsüsteem, wo die lokaale hermandades abglööst het, wo bis denn üüblig gsi si, und d Rächt vo dr lokaale Aristokratii iigschränkt het.

Litratuur

Juan Eslava Galán, Juan: Los reyes católicos. Editorial Planeta, Barcelona 2004, ISBN 978-84-08-05121-3.
Hans Leicht: Isabella von Kastilien. Königin am Vorabend der spanischen Weltmacht. Verlag Friedrich Pustest, Räägensburg 1994, ISBN 3-7917-1436-8
Jean B. de Nervo: Isabelle la Catholique, reine d'Espagne. Sa vie, son temps, son règne. Lévy, Bariis 1874
Joseph Pérez: Ferdinand und Isabella. Spanien zur Zeit der katholischen Könige („Isabelle et Ferdinand, rois catholiques d'Espagne“). Diederichs, Münche 1996, ISBN 3-424-01238-6
Horst Pietschmann: Isabella die ‘Katholische’. In: Lexikon des Mittelalters (LexMA). Band 5, Artemis & Winkler, Münche/Züri 1991, ISBN 3-7608-8905-0, Sp. 669–671.
William Hickling Prescott: Geschichte der Regierung Ferdinands und Isabellas der Katholischen von Spanien („History of the reign of Ferdinand and Isabelle the Catholic of Spain“). Brockhaus, Leipzig 1843 (2 Bänd)

Weblingg

Commons: Isabella I. (Kastilien) – Album mit Multimediadateie

Dä Artikel basiert uff ere fräie Übersetzig vum Artikel „Isabella_I._(Kastilien)“ vu de dütsche Wikipedia. E Liste vu de Autore un Versione isch do z finde.