Dr israelisch-egüptisch Friidensverdraag

Dr israelisch-egüptisch Friidensverdraag isch am 26. Merz 1979 in dr amerikanische Hauptstadt Washington vom Ministerbresidänt vo Israel, em Menachem Begin, und vom Bresidänt vo Egüpte, em Anwar as-Sadat, underschriibe worde. Dr amerikanisch Bresidänt, de Jimmy Carter, het dr Friidensverdraag as Züüge underschriibe, wie au scho s Camp-David-Abkomme vorhäär.

Dr Sadat, dr Carter und dr Begin vor em Wisse Huus, 1979

Dr Verdraag het die gegesitigi Anerkennig und s Ändi vom Chriegszuestand, wo sit 1948 gherrscht het, festgläit. Israel het d Sinai-Halbinsle zämme mit de Ärdölkwelle und strategische Pünkt dört zruggee, die israelische Siidlige abbaut und die jüüdischi Bevölkerig vo dene Gebiet repatriiert, was zum Bischbil z Jamit nume mit Gwalt gange isch. Israelischi Schiff häi dur e Suezkanal duuredörfe und d Strooss vo Tiran und dr Golf vo Akaba si als internazionali Wasserwääg anerkennt worde.

Egüpte isch mit däm Verdraag dr ersti arabischi Staat gsi, wo Israel offiziell anerkennt het. Jordanie het denn im Joor 1994 mit Israel dr israelisch-jordanischi Friidensverdraag abgschlosse, und het druf vo de USA vil Gäld überchoo.

Dr Jimmy Carter, wo zwüsche de bäide Bardeie vermiddlet het, het zerst en umfassendi Löösig vom Komflikt im Nooche Oste aagsträbt, wo au d Sowjetunion e Däil drvo gsi wer. Israel het aber e diräkte Kontakt mit Egüpte welle und het e separati Löösig vorzooge. Dr Carter het die Bemüejige öffentlig understützt und eso en umfassendi Löösig verhinderet und und d Sowjets muff gmacht, wil si s Gfüül gha häi, er häig sä iinegläit.

Uf Egüpte und si Bresidänt Anwar as-Sadat si wägen em Verdraag d Islamiste wüetig gsi und au die mäiste andere arabische Staat, wo d Anerkennig vo Israel as e Tabubruch aagluegt häi. Zwäi Joor spööter häi denn egüptischi Islamiste dr Anwar as-Sadat ermordet, was zur Diktatur vom Husni Mubarak gfüert het.

Weblingg ändere

  Dä Artikel basiert uff ere fräie Übersetzig vum Artikel „Israelisch-ägyptischer_Friedensvertrag“ vu de dütsche Wikipedia. E Liste vu de Autore un Versione isch do z finde.