Jüüdischi Stuudie

Jüüdischi Stuudie und Judaistik si die offizielle Bezäichnige von ere wüsseschaftlige Diszipliin, wo an meerere dütschsproochige Uniwersidääte gleert wird und noch iirem Sälbstverständnis d Dradizioon vo dr Wüsseschaft vom Juudedum witerfüert, wo sich im 19. Joorhundert as äigeständigi akadeemischi Diszipliin entwigglet het.

Dr Forschigsgeegestand vom Fach

S Fach Jüüdischi Studie/Judaistik erforscht und vermiddlet d Gschicht, Liddratuur-, Religioons- und Kultuurgschicht vom Juudedum nit as passivs Objekt vo üssere Iiflüss, sondern as aktiive Däil vo dr allgemäine Kultuur. Für zum sich mit dr jüüdische Religioons- und Kultuurgschicht chönne usenandersetze, muess mä d Kwellesprooche vom Juudedum, bsundrigs Hebräisch, aber je noch dr Spezialisierig au Aramäisch, Judeo-Araabisch, Jiddisch, Ladino, Judeo-Persisch und Judeo-Griechisch chönne. S Studium vo dr hebräische Sprooch möögligst in alle iire Entwiggligsstuefe (biiblisch, rabbiinisch, middelalterlig, modäärn) wird as Grundvorussetzig für die kritischi Kwellelektüüre aagluegt scho vom Bachelorstudium aa.

D Judaistik und d Wüsseschaft vom Juudedum

D Judaistik stoot zwar in dr Dradizioon vo dr Wüsseschaft vom Juudedum, was dr filoloogisch und kulturhistoorisch Aaspruch aagoot, es git aber en Underschiid: Wäärend d Wüsseschaft vom Juudedum e Diszipliin vo Juude für Juude gsi isch, wo under anderem dr Nöidefinizioon vo dr jüüdische Identidäät im modärne Staat hätt sölle diene, wird in Jüüdische Studie/Judaistik Wärt druf gläit, s Juudedum vom ene nöitraale Standpunkt us z erforsche. Doorum isch s Fach mäistens an ere Filosoofische Fakultaät oder in äim vo de gschichts- und kultuurwüsseschaftlige Fachberiich dehäi und nit an ere Theoloogische Fakultäät.

Liddratuur

• Michael Brenner, Stefan Rohrbacher (Hrsg.): Wissenschaft vom Judentum. Annäherungen nach dem Holocaust. Vandenhoeck & Ruprecht, Göttinge 2000, ISBN 3-525-20807-3.
• Andreas Lehnardt (Hrsg.): Judaistik im Wandel. Ein halbes Jahrhundert Forschung und Lehre über das Judentum in Deutschland, De Gruyter, Berlin, Boston 2017, ISBN 978-3-11-052347-8.
• Günter Stemberger: Einführung in die Judaistik. C. H. Beck, Münche 2002, ISBN 3-406-49333-5.
• Journal of Ancient Judaism. Zeitschrift. Vandenhoeck & Ruprecht, ISSN 1869-3296.

Weblingg

• Fachinformationsdienst Jüdische Studien
• Vorlage:Dmoz
• Verband der Judaisten in Deutschland e.V.
• Vereinigung für Jüdische Studien
• Literaturempfehlungen und Onlineressourcen zu den Fachbereichen Jüdische Studien und Judaistik