Jakob Meyer zem Hirze

Dialäkt: Baseldütsch

Dr Jakob Meyer zem Hirze (* 1473 z Baasel, † 4. Oktober 1541 z Baasel) isch e Baasler Politiker im 16. Joorhundert gsi.

Lääbe und Karriere

Dr Jakob Meyer isch 1473 as Soon vom Rootsher Heinrich Meyer uf d Wält choo, wo bi dr Handwärkerzumft zu Gartner zümftig gsi isch. Dr Jakob het sich in d Herezümft Zu Husgnosse, Zum Schlüssel und Ze Safre iikauft. Er het druf as Duechhändler und mit Kreditgschäft afo Gäld mache. 1509 isch er Säggser bi dr Zumft zum Schlüssel worde. 1505 isch er bi dr Schlacht vo Marignano drbii gsi, wo d Äidgenosse vo de Franzoose gschlaage worde si. 1517 isch er für Husgnosse im Root gsässe. Wo 1521 dr Skandal um die ghäime franzöösische Bangsioone usbroche isch, isch dr Meyer äine vo de weenige Rootshere gsi, wo sich gwäigeret ghaa häi, die Bestächigsgälder aaznee. Die bro-franzöösischi Bardei im Root isch us em Amt gjagd worde, under ene dr Oberstzumftmäister Ulrich Falkner, und dr Meyer het 1522 däm si Boste übernoo.

Im Root het er, im Geegesatz zu vile patrizische Rootshere, d Reformazioon understützt und isch mit füerende Reformatore wie am Konrad Pellikan und em Johannes Oekolampad in Verbindig gstande. Dr Druck vo unde für d Reformazioon isch immer sterker worde und 1529 si die altglöibige Rootshere us em Root usgschlosse worde. Dr Meyer isch 1530 Bürgermäister worde und het die braktischi Organisazioon vo dr reformierte Kiirche gläitet. D Klöster si ufghoobe worde, d Uniwersidäät isch vo dr Stadt übernoo worde wie au d Latiinschuel.

Dr Meyer zum Hirze isch immer wider dr Abgordneti für Baasel bi de äidgenössische Daagsatzige gsi und isch au Mitgliid vo Gsandschafte zum Riich gsi. Baasel het ängeri Bindige zum Riich gha as anderi äidgenössischi Ständ. D Stadt isch dorum intressiert gsi dra, ass d Underschiid zwüschen em Riich und dr Äidgenosseschaft so chlii wie mööglig bliibi. In däm Raame het dr Meyer zum Hirze Kontakt mit de Stroossburger Theolooge Martin Bucer und Wolfgang Capito pflägt. Er het brobiert d Geegesätz im brotestantische Laager uszgliiche und het zwüschen em Luther und de Schwizer Reformierte vermiddlet.

D Familie

Dr Jakob Meyer zem Hirze isch mit dr Anna vo Dachsfäld verhürootet gsi und si häi zwäi Söön ghaa, dr spööter Rootsher und Mäister zum Schlüssel Johann Rudolf und dr Jakob, wo Pfarer in dr Dalbe worde isch. Dr Jakob Meyer isch 1541 gstorbe und het e Familie hinderloo, wo im Zentrum vo dr Macht z Baasel gstande isch. Aber bi de Usbrüch vo dr Pest 1540 und 1564 si drei Vierdel vo de Änkelchinder vom Meyer gstorbe. D Familie isch zwar au im 17. Joorhundert no regimäntsfähig gsi, aber nie me so bedütend wi zur Zit vom Jakob Meyer.