D Baasler Safre-Zumft

E. E. Zumft zu Safre isch en öffentlig-rächtligi Korporazioon vo dr Stadt Baasel und isch äini vo de vier Baasler Herrenzümft. Si isch scho immer e Sammelkorporazioon gsi, wo verschidnigi Bruefsständ verdräte het und au hüte no für alli Brufsständ offen isch.

E. E. Zunft zu Safran
Zwäck:	Zumft
Vorsitz:	Michael Geiger (Meister)
Gründigsdatum:	vor 1372
Mitgliiderzaal:	~360
Sitz:	Gärbergass 11, Baasel
Website:	http://www.safranzunft.ch/

Dialäkt: Baseldütsch

Gärbergass 11, Sitz vo dr E. E. Zumft zu Safre

Gschicht

D Safre-Zumft wird zum erste Mol 1372 erwäänt, aber si goot woorschinlig uf s 13. Joorhundert zrugg. Si isch as d Zumft vo de Gwürzhändler und Chröömer gründet worde, aber bald si au Drogiste und Apideeker ufgnoo worde, denn au d Händler mit Bauelle, Liinduech und Siide. Au d Huet- und Perüggemacher, d Cuafföör, d Juwelehändler und Silberchröömer, d Wissgärber, d Händschemacher, d Chnopfmacher, d Rotgiesser, Noodler und Spängler. Schliesslig häi au vili mit Brüef wo mit Pergamänt und Babbiir z due gha häi, zur Safre-Zumft ghöört.

S Zumfthuus

S erste Gsellschaftshuus isch am Imbergässli gsi, wil dört bsundrigs vil Händler und Chröömer gwoont häi. 1423 het d Zumft vom Root dr Ballhoof am Rindermäärt (Gärbergass 11) nid wit vom stedtische Kaufhuus kauft und dört e Gsellschaftshuus baut. 1562 und 1578 isch s umbaut worde und het e nöiji Fassaade überchoo, wo men em Baumäister Daniel Heintz zueschribt. S Huus vo dr Safrezumft gältet as äins vo de Hauptwärk vo dr Rönessans in dr Schwiz.

Litratuur

• Paul Koelner: Die Safranzunft zu Basel und ihre Handwerke und Gewerbe, Basel 1935

Weblingg

• Website der Zunft
• Bordret bi dr Bürgergmäind Baasel

 Commons: Gerbergasse 11, Basel – Sammlig vo Multimediadateie

Fuessnoote

47.5572897.588263