Basler Korporazioone

Es git 29 öffentlig-rächtligi Korporazioone z Basel, wo die mäiste von ene us em spoote Middelalter stamme. Die historisch bedütendste under dene si d Zümft, wo im 13. und 14. Joorhundert gründet worde si und no di noo die politischi Macht in dr Stadt an sich grisse häi, bis si sä im Lauf vom 19. Joorhundert wider verloore häi.

S Siigel vo dr Basler Kürschnerzumft us em Joor 1719
Dialäkt: Baseldütsch

Bi Korporazioone vo dr Stadt Basel stoot vor em äigentlige Korporazioonsnaame «E.E.», wo «eine ehrenwerte» bedütet.

D Chläibasler si, wo iir Stedtli im 14. Joorhundert zur groosse Stadt cho isch, au in d Groossbasler Zümft integriert worde, häi aber au iiri äigene Eeregsellschafte ghaa: «Zum Rääbhuus», «Zur Hääre» und «Zum Gryff».

Wo im 15. Joorhundert d Stadt erwiteret und die nöije Stadtmuure baut worde si, häi sich in de fümf Vorstedt Gsellschafte afo entwickle: Im Santihans d Vorstadtgsellschaft «Zur Mägd», in dr Spalevorstadt d «Zur Kräije», in dr Steinevorstadt «Zu de Drei Eidgenosse», in dr Aeschevorstadt «Zum Rupf» und in dr Dalbevorstadt d Gsellschaft «Zum hooche Dolder».

Sust git s no d «Gsellschaft vo de Füürschütze», wo 1466 gründet worden isch, die «Akademischi Zumft» us em 19. Joorhundert und d «Bürgerkorporation Chläihünige», wo sit dr Iigmäindig vo Chläihünige 1908 dört en äänligi Rolle schbiilt wie d Eeregsellschafte im Chläibasel.

Zu de historische Baasler Korporazioone ghööre au die middelalterlige Freihäitsgnaabe uf em Koolebärg, won e äigeni Grichtsbarkäit ghaa häi.

D Bedütig vo de Basler Korporazioone ändere

Vor allem d Zümft si politisch wääred Joorhunderte seer iiflussriich gsi, aber im Lauf vom 19. Joorhundert häi si iiri Rolle in dr Politik, dr Verdäidigung vo dr Stadt und andere öffentlige Gebiet verloore und si zun ere Art gsellschaftlige Veräin worde. 1942 het dr Mäister «Zu Safran» en Iniziative lansiert und alli Mäister vo de Zümft, vo de Eeregsellschafte und Vorstadtgsellschafte zum erste Mäisterbott iiglaade, wo denn jeedes Joor mindestens äimol im Früelig stattgfunde het. S Ziil vo dere Versammlig isch gsi, die gmäinsaame Interässe vo de Korporazioone dr Bürgergmäind gegenüber z verdräte und mit andere Korporazioone im In- und Usland Bezieige z underhalte. Dr Früeligsbott weelt e Fümfer-Usschuss und e Seckelmäister und Schriiber.[1]

D Ufgoobe vo de Korporazioone si gsellschaftlig und kulturell. Wichdig isch allne, ass d Gsellikäit vo de Mitgliider nit z churz chunnt. Si häi au Fonds für zum Mitgliider, wo in Noot cho si, z understütze. Si organisiere die jöörlige Jungbürgerfiire und schaffe mit dr GGG zämme zum d Integrazioon z fördere. E Hufe vo de Zümft understütze iiri überliiferete Zumftbrüef mit Stipändie.[2] Die drei Chläibasler Eeregsellschafte organisiere jeedes Joor dr Vogel Gryff.


Fuessnoote ändere

  1. Das Meisterbott (Memento vom 9. Septämber 2012 im Internet Archive) uf dr Website vo de Basler Zümft, abgrüeft am 4. August 2012
  2. Die Bedeutung der E. Zünfte und E. Gesellschaften der Stadt Basel (Memento vom 27. Septämber 2012 im Internet Archive) uf dr Website vo de Basler Zümft, abgrüeft am 4. August 2012