Joan Sutherland

D Joan Alston Sutherland DBE OM (* 7. November 1926 z Sydney, New South Wales; † 10. Oktober 2010 z Gämf, Schwiiz) isch e australischi Sopranistin gsi.

Joan Sutherland im Johr 1975

Joan Sutherland, 1990

Läbe

Mit nüünzähni het si am Konservatorium z Sydney afo studiere. Si isch z Australie ufdräte bevor si 1951 uf London gangen isch, zum ihri Usbildig wiiterzfüehre. E Johr druf het si as 1. Dame im Mozart siiner Zauberflöte am Royal Opera House in Covent Garden debütiert, wo ihri Begabig as Koloratursopranistin entdeckt worden isch.

Si het sich zu einere vo de beste Sängerinne in ihrem Fach entwigglet und het in de Johr druf an de grosse Operehüüser gsunge: 1959 an dr Wiener Staatsoper, 1960 an dr Mailänder Scala, 1961 an dr New Yorker Metropolitan Opera, wo si d Titelpartii im Gaetano Donizetti siiner Lucia di Lammermoor under em Dirigänt Silvio Varviso, wo denn au siis Debüt geh het, gsunge het. Ihri Fan hai ere La Stupenda (Die Wunderbari) gsait. 1983 het si an dr Metropolitan Opera e sehr erfolgriichs Comeback gmacht in ihrer Glanzrolle vo dr Lucia di Lammermoor.

Grab vu dr Sutherland uf em Friidhoof z Clarens VD.

1961 isch d Joan Sutherland Commander of the British Empire worde, 1978 Dame Commander und 1991 het si d Königin Elizabeth II. persönlig mit em Order of Merit uszeichnet.

Ihren Abschiid vom Royal Opera House z London het si 1990 in Die Fledermaus an dr Siite vom Luciano Pavarotti und dr Marilyn Horne gee.

Sit 1954 isch si mit em australische Dirigänt Richard Bonynge verhürotet gsi, und isch hüfig under däm siiner musikalische Leitig ufdräte und het mit em au e Huffe Belcanto-Opere iigspiilt. Mit ihm het si e Sohn, dr Adam, gha.

D Joan Sutherland het stimmligi Sicherheit und Klanginstinkt verbunde und gältet as eini vo de bedütendste Sängerinne vom 20. Johrhundert.

Weblingg

•  Commons: Joan Sutherland – Sammlig vo Multimediadateie
• Joan Sutherland. In: FemBio. Frauen-Biographieforschung (mit Literaturaagaben un Zitat).
• Joan Sutherland in de Internet Movie Database (änglisch)
• Discographii vo dr Joan Sutherland (änglisch)
• Joan Sutherland bi MusicBrainz (änglisch)
• Broadcast audition “J.Sutherland-Russian rarities” (cycle “From collection of the rare recordings” by Maxim Malkov – in Russian).
• Dankgottesdienst in dr Westminster-Abbey 15.Februar 2011 (PDF; 519 kB)

Noowiis

Dä Artikel basiert uff ere fräie Übersetzig vu dere Version vum Artikel „Joan_Sutherland“ vu de dütsche Wikipedia. E Liste vu de Autore un Versione isch do z finde.