Johann Rudolf vo Frisching

Dr Johann Rudolf vo Frisching (* 17. August 1761 z Bärn; † 5. August 1838 äbeda) isch e Bärner Bruefsmilitär und Politiker in dr Zyt vo dr Helvetische Republik gsy.

Johann Rudolf vo Frisching (um 1820)

Läbenslauf

Dr Johann Rudolf vo Frisching isch 1761 z Bärn uf d Wält cho als Suhn vom Franz Rudolf vo Frisching, emene Offizier und Landvogt, wo ou Herr vo Rümlige gsy isch. Er het sich 1790 mit dr Elisabeth Sophie Frisching, dr Tochter vom Johann Rudolf Frisching (1724-78) und Erbin vom Frischinghuus verhüratet.

Dr Frisching isch wie si Vater Bruefsoffizier i dr holländische Schwyzergarde gsi. Nachdäm er isch uf Bärn zruggcho, isch er 1795 Grossrat worde. I dr Helvetik het er e churzi Karriere vo 1801 bis 1802 gha: er isch Mitglid vom Senat, vom Chlyne Rat, und dr Zwöit Landamme hinder em Alois Reding gsy. 1803 isch er wider im Grosse Rat gsässe. 1807 het er vo sim Vater ds Schloss Rümlige gerbt.

Dr Johann Rudolf vo Frisching isch 1838 z Bärn gstorbe. Si Tochder, d Alette Rosine Sophie, und ihre Maa, dr Friedrich Ludwig vo Wattewyl, hei Rümlige und ds Frisching-Stadtpalais (s Beatrice-vo-Wattewyl-Huus) gerbt.

Quelle

• Barbara Braun-Bucher: Frisching, Johann Rudolf von. In: Historisches Lexikon vo dr Schwiiz.