Johannes Martin
Dr Johannes Martin isch am 2. Merze 1803 z Sissech uf d Wält cho und isch irgend einisch an eme unbekannte Ort z Südamerika gschtorbe. Är isch reformiert, Bürger vo Fränkedorf, Politiker und Revoluzzer gsi.
Sys Läbe
ändereDr Johannes Martin isch dr Soon vom Johann Jakob Martin, Bezirksschryber z Sissech und dr Verena Christen gsi. In erschter E`e het är 1843 d Anna Tschudin vo Sissech ghürotet, in zwöiter E`e 1845 d Anna Barbara Weiss vo Fränkedorf und in dritter E`e 1853 d Charlotte Euphrasina Liardet vo Belmont in dr Waadt.
Dr Johannes Martin het in de 1820er-Joore z Frankrych im Schwyzer Regiment dient und het s bis zum Lütnant brocht. Zrugg in dr Schwyz isch är Quartieradjutant z Sissech gsi. Sit im Herbscht 1830 het är sich für d Trennig vom Kanton Basel ygsetzt. Im Joor 1831 isch är es Mitglyd vo dr provisorische Kantonsregierung und vo 1832 bis 1839 z Arlese Bezirksschryber gsi. Im Joor 1836 het s Volk yn in Landrot gweelt.
Dr Revoluzzer
ändereAb 1837 isch är eine vo de füerende Chöpf von ere Sammlig vo Unzfridene gsi, wo gege d Kantonsbehörde opponiert hei. 1839 het är s frömdefindlige Komitee vo de Vaterlandsfründe gründet. Im Joor 1840 het är e füerendi Rolle bim Gmeinijoggeliputsch z Gälterchinde gschpilt und isch zäme mit em Gmeinijoggeli verhaftet worde. Dr Johannes Martin isch mit eme Joor Zuchthuus bschtroft worde. Är isch e raschtlose Revoluzzer gsi, bis är 1860 nach Südamerika usgwanderet isch. D Umschtänd, dr Zytpunkt und dr Ort vo sym Tod si nit bekannt.
Literarischi Verwys
ändere- Weber K.: Ein Putsch im Baselbiet anno 1840, 1913, bes. 19ff.
- Schweizer Ed. in: Basler Zeitschrift für Geschichte und Altertumskunde 30 und 33.
- Blum 1977, passim (s. Register).
- Hug W.: Stammtafeln Martin von Frenkendorf, 1985, Tafel 40
Weblink
ändereDr Johannes Martin im Persone Lexikon vom Kanton Basel Landschaft (Site cha nüme abgrüeft wärde; Suche im Webarchiv)