Kathedrale Maria Himmelfaart z Chur
D Kathedrale Maria Himmelfaart i dr Stadt Chur im Kanton Graubünde isch d Chilche vom Bischof vo Chur. Si treit dr Name vo dr Maria Himmelfaart.
![](http://upload.wikimedia.org/wikipedia/commons/thumb/d/d8/Chur_Kathedrale_1.jpg/220px-Chur_Kathedrale_1.jpg)
Uf em Hügel, wo markant über dr Stadt Chur liit, isch dr «Hof» mid Ringmuure und Dürm, wo dr Sitz vom Bischof isch, und am öschtleche Rand vo däm Areal stoot d Kathedrale. Es isch aznää, ass scho dr erscht Bischof vo Chur, wo me dank ere Kwelle us em Joor 451 kennt, dr Asinio, e Bischofschilche gha het.
D Chilche, so wie me se im Ganze no hüt gseht, isch vo dr Middi vom 12. Joorhundert a im spotromanische Stil bout worde. Si het d Grundform von ere Basilika mit drü Joch überem Middelschiff, zwei Syteschiff und em Chorruum. Am 19. Juni 1272 isch d Kathedrale fertig gsi und ygweit worde.
Vo der früemiddelalterleche Bischofschilche sind schöni Reliefplatte us Vinschgauer Marmor vo Laas erhalte blibe. Vor dr Krypta het s grossi romaneschi Steifigure vo de vier Aposchtel. Dr Hochaltar und es Veschperbild het dr Jakob Russ i dr Zyt bis ane 1492 gschnitzlet.
Ane 1811 isch s im Hof zum ene Grossbrand cho, und drufabe het me näbem nördleche Syteschiff dr neu Durm bout.
I dr Kathedrale wird e wärtvolle Domschatz mid Sache sid em Middelalter ufbewahrt.
Rund um d Liturgii finde under im Programm «Dommusig Chur» verschidnegi Forme vo Chilemusig statt.[1] Der Domchor isch ane 1854 gründet worde.
Literatur
ändere- Jutta Betz, Gregor Peda: Kathedrale St. Mariä Himmelfahrt zu Chur: Diözese Chur, Kanton Graubünden. Passau 2009, ISBN 978-3-89643-738-9.
Weblink
ändere- Gschicht vo dr Kathedrale uf bistum-chur.ch
Fuessnoote
ändere- ↑ Dommusig Chur uf kathgchur.ch
Koordinate: 46° 50′ 51,7″ N, 9° 32′ 7,4″ O; CH1903: 759905 / 190641