Unser Fraue Dag

Unser Fraue Dag, Frauetag, Unser Fraue Dult, Augschtheiligtag, Meitlipalmtag, Mariä Himmelfahrt oder nu Himmelfahrt (latiin. Assumptio Beatae Mariae Virginis, dytsch Mariä Aufnahme in den Himmel) isch e Hochfescht vu dr remisch-katholische Chilchen am 15. Augschte. In dr altkatholische Chilche wird dr 15. Augschten as Haimgang vu dr Mareie gfyrt. Au di orthodoxe Chilche, vor allem di syrisch-orthodox Chilche, fyre s Fescht am 15. Augschte – je no Dailchilche noch em alte oder neie Kaländer – unter em Name Vertschlofig vu dr hochhailige Maischteri, wu Gott uf d Wält brocht het. Am 15. Augschte vum alte Kaländer (28. Augschte vum neie) cheme di russisch-, serbisch-, georgisch-, griechisch- un d koptisch-orthodox Chilche mit em Fraue-Dag. Am 29. Augschte fyrt di armenisch-apostolisch Chilche d Uffert vu dr Mareie.

Unser Fraue Dag, Tizian, um 1516

Theologische Hintergrund

S Fest Ufnahm vu dr Mareie in dr Himmel goht uf e Mareiefescht zrugg, wu dr Cyrill vu Alexandrie im 5. Johrhundert yygfiert gha het. Des Fescht het er uf dr 15. Augschte glait. Mit dr Noofyyr hert in dr Oschtchilche s Chilchejohr uf, wu am 1. Septämber mit dr Vorfyyr vu dr Geburt vu dr Maria am 8. Septämber aafangt.

Bruuchtum

Am Fraue-Dag wäre Chryterstryss (Balme, Augschtmaie, Himmelfahrtsstruss oder au Mairechrüterstruss) in d Chilche mitbrocht un gsäägnet. Die Stryss gälten unter anderem as Mittel bi Wunde.

D Wurzle vum Allermannsharnisch soll dr Dreeger gege Schuss, Stich un Stupf uuverwundbar mache, wänn si an Unser Fraue-Dag vor em Sunnenufgang graben un häälige unter s Altarduech an die Stell glait wird, wu s Brot un dr Wyy stehn.

No dr Gottesdienscht git s in vil Ort Prozessione, aini vu dr greschte findet im allgaierische Maria Vesperbild statt.

Sunschtigs

Dr Zytruum zwisch em Fraue-Dag (15. Augschte) un Maria Geburt (8. September) nännt mer au Fraue-Dryssger.

Sprichwerter

• Wie Maria über’s Gebirg got [an Maria Heimsuchung, 2. Juli], so chunnt si au wider z’rugg [an Maria Himmelfahrt, 15. August]
• Maria Himmelfart fellt d‘ Chilbi (Zollike, am Sunntig no Unser Fraue-Dag fang z Zollike d Chilbi aa).

Gsetzlige Fyyrtig

Unser Fraue-Dag isch e gsetzlige Fyyrtig z Eschtrych, e Staatsfyyrtig z Liechtestaa, in acht Schwyzer Kantön e dr Sunntig glychgstellte Fyyrtig, in sibe wytere Kanton zmindescht in e Dail Gmaine ne arbetsfreie Dag, e gsetzlige Fyyrtig in zwai Länder z Dytschland, im Saarland un z Bayern in Gmaine mit ere katholische Bevelkerig (rund 1700 vu 2056 Gmaine).

E gsetzlige Fyyrtig isch Unser Fraue-Dag au in andere katholische Länder wie zem Byschpel Belgie, Frankrych, Italie, Kroatie, Litaue, Luxemburg, Malta, Pole, Portugal, Slowenie un Spanie, aber au in dr orthodoxe Länder Griecheland, Georgie, Rumänie un Zypere.

Chilche vo dr Maria Himmelfaart

• Kathedrale Maria Himmelfaart z Chur
• Pfarrchilche Maria Himmelfaart vo Bade

Lueg au

• Santa Maria in Calanca mit em Gmeindwappe vo dr Maria Himmelfaart

Literatur

• Stephen J. Shoemaker: Ancient Traditions of the Virgin Mary’s Dormition and Assumption. Oxford University Press, Oxford u. a. 2002, ISBN 0-19-925075-8 (= Oxford Early Christian Studies).

Weblink

 Commons: Unser Fraue-Dag – Sammlig vo Multimediadateie

• Maria – Assunta – „Mariä Himmelfahrt“. Ökumenisches Heiligenlexikon