Kleisthenes vo Athen

Dr Naame vom Kleisthenes vo Athen (im Dütsche bedoont mä die ersti Silbe: 'Klëisthenes; uf Griechisch die zwäiti: Κλεισθένης = Kleisthénēs, * um 570 v. d. Z.; † um 507 v. d. Z.) isch undrennbar verbunde mit de politische Reforme, wo 508/507 v. d. Z. z Athen duuregfüert worde si und wo in dr Gschichtsforschig as Mäilestäi uf em Wääg zur attische Demokratii aagluegt wärde.

E modärni Büste vom Kleisthenes im Ohio House.

Dr Kleisthenes isch vo dr Familie vo de Alkmaionide abgstammt und isch woorschinlig scho under em Tyrann Hippias im Joor 525/24 v. d. Z. Archon worde. D Alkmaionide häi zu de Eupatridai, de iiflussriiche attische Adelsgschlächter, ghöört und si eso potenzielli Riwale vo dr Peisistratide-Tyrannis gsi. Villicht het dr Kleisthenes scho churz noch sim Archontat mit de Alkmaionide Athen verloo, zum vo usse gege d Pesistratide z mobilisiere. Si häi s Orakel vo Delfi finanziell understützt und eso d Briesterschaft dört gege s Athener Tyranne-Reschiim gstimmt. Mit de richdige Orakelsprüch häi si d Spartaner für Blään gwunne zum d Peisistratide z stürze. Dr spartanisch Köönig Kleomenes I. het schliesslig dr Hippias 510 v. d. Z. verdriibe.

Dr Kleisthenes und d Alkmaionide si us em Exil zrugg uf Athen choo. Dr Isagoras, wo 508/507 v. d. Z. Archon gsi isch, isch dr Gegner vom Kleisthenes worde, wo radikali Reforme het welle duuresetze. Dr Kleomenes I. het dr Isagoras understützt und dr Kleisthenes und sini politische Gfäärte häi Athen müesse verloo. Bald druf häi si aber scho wider zruggchönne, wil dr Root, wo groossi Däil vo de Bürger representiert het, sich gege dr Isagoras gwändet het. Dr Kleisthenes het eso d Gläägehäit überchoo, die politische Strukture vo dr attische Polis vo Grund uf nöi z ordne. Er het das eso gmacht, ass dr Herodot in iim dr Begründer vo dr Demokratii gsee het.

Dä Artikel basiert uff ere fräie Übersetzig vum Artikel „Kleisthenes_von_Athen“ vu de dütsche Wikipedia. E Liste vu de Autore un Versione isch do z finde.