Chloster Liide Christi

S Chloster Liide Christi isch e Kapuzinnerinechloster z Jakobsbad bi Gonte.

Jakobsbad mit em Chloster Liide Christi

Gschicht

Dor e Novizin us em Chloster Wonnestee bi Tüüfe isch 1851 zwösche Gonte ond Urnäsch da Frouechloster grönded worde. Fööf Johr spööter isch Grönderi gstorbe ond di gäästlich Läätig vom Mueterchloster Wonnestee öbernoo worde. Sed 1918 ischt s Chloster sölbstendig. Bis 1866 häts zom Bistum Chur ghört ond sed do hät de Bischof vo Sangalle s Visitazionsrecht.

Konvent

S Chloster Liide Christi isch em Terziarinneorde noch em Franz vo Assisi aagschlosse. S Patrozinium fiirids im Chloster am Fest vo de Schmerzensmueter Maria. D Chlosterfroue görtid si mit eme rote Strick as Zääche för d Verehrig vom Chostbare Bluet Christi.

Konventsentwicklig

Johr	1930	1994	2001	2006	2013	2015
Schwöstere	46	15	13	11	8	7

Am Stiftigsfäscht vom 18. Augste 2013 sends 8 Schwöstere ond zwää Novizinne gsee.

Zytlichi Profäss

Am Saamstig, 26. Abröll 2014, hönd d Maria Elisabeth Pustelnik (22) und d Maria Chiara Eicher (43) de wyss Schleier vo de Novizinne gäge de schwaaz vo de Schwöstere iituusched. Im Festgottesdienst hönd die beede ehemolige Novizinne eres Profässvespräche abglääd, vor de Frau Muetter, de Schwöster Mirjam, ond vor de vesammlete Gmeend. För die beede Kapuzinerinne chommid jetzt dröi witeri Johr bis zur ewige Profäss, e Zyt zomm eri Entschaidig fös Chlooste z öbeprüefe.

Chlosterlade

Sed 1916 stöllid d Chlosterfroue us Chrüüter, wos zom Tääl im äägne Garte aapflanzid, veschidnigi Häälmittel här. Im Chlosterlade, wo sed a paar Johr ime renovierte Näbegeböi ischt, werdid dia Medikament nebet anderne Produkt verchauft. E Spezialität isch de Chlosterliggör Angelika.

Weblink

 Commons: Chloster Liide Christi – Sammlig vo Multimediadateie

• Internetsite vom Chloster Liide Christi
• Christian Schweizer: Chloster Liide Christi. In: Historisches Lexikon vo dr Schwiiz.
• Chloster Liide Christi uf ORDEN online